Keta ta’uk loke imi-nia fuan ba Kristu
Cassa 27/05/2022, ho fuan nakonu ho gratidaun sarani no estudante Cassa hamutuk entrega fila fali ilas Papa são João Paulo II ba Aldeia Faulata. Hahu simu estatua ne’e iha loron 14 fulan Maio 2022, husi Hatu-Udo.
Durante semana rua nia laran, ilas Papa são João Paulo II vizita iha suco Cassa, liu-liu iha escola EBS Cassa, Eskola Basico Filial – Luan-Cadoi no vizita mos eskola EBF-Lias. Hafoin entrega fila fali ilas papa São João Paulo II ba Aldeia Faulata, molok entrega taka ho missa.
Iha celebrasaun Eucaristia ne’e Padre celebrante Pe. Eugenio Redentor iha nia homilia dehan: Papa São João Paulo II mak santo ida ne’ebe moris iha ita nia tempu ne’ebe ema barak koñese nia liu-liu tanba nia sama ona iha ita nia rai Timor, santo ida ne’ebe besik mos ba ita, ita koñese nia didiak, santo balun ita rona deit sira nia istoria maibe, santo ida ne’e besik ita no balun mos hasoru nia. Ita nia Estado hili nia sai Patronu ba Edukasaun no Padroeira ba Nasaun mak Nai Feto Imakulada conseição de Maria. Buat ne’ebe importante ba ita mak saida? Nia mensagen ba ita sarani no foinsa’e sira iha momento ne’ebe nia vizita mak nia dehan: “ imi mak masin rai nian no naroman mundo nian” liafuan atu dehan mai ita katak, ita sarani tenke iha folin. Exemplo: masin wanhira tau ba modo ita la hare nia forma maibe, sente nia gostu, wanhira hahan mak masin la iha ne’e oin seluk ka gostu la iha, nune’e mos naroman, wanhira ahi mate ita sunu lilin tau iha fatin aas ka tau iha kama okos? tau iha fatin aas atu fo naroman ba uma laran. Ita nia moris sarani ne’e mos tenke hatudu sai ba ema atu ema hare. Hanesan introdusaun ne’ebe fo hanoin ba ita kona ba santidade, santidade mak wanhira ita simu ona Batismu ne’e ita iha obrigasaun no hakas-an atu sai santo. Sai santo laos sai padre ka madre sia deit mak sai santo no sarani bai-bain ne’e la bele sai santu, ne’e ita hanoin sala, tanba santidade ne’e ba ema hotu, tan ne’e ema hotu-hotu ne’ebe simu ona sakramento Batismo ne’e bele sai santo. Sai santo laos taka liman reza deit ne’e la iha, sai santo ne’e katak moris diak, moris los no moris iha Maromak nia grasa. Hafoin Padre fo hanoin ba sira ne’ebe atu simu sakramento Batismo no Eukaristia katak: Sira hotu ne’ebe ohin simu sakramento Batismo no sakramento Eukaristia ne’e tanba atu moris iha Maromak nia grasa. Grasa ne’e hanesan bee matan ne’ebe ita presisa hemu, bee matan ida atu to’o iha Bairo ita presisa kanu, atu nune’e nia bele to’o ita nia uma, bee nia funsaun ne’e tulun ita atu ba buat hotu, hamrok hemu, haris. Nune’e mos Maromak nia grasa atu to’o mai ita ne’e ita presisa dalan ida, dalan ne’e mak ita hanaran sakramento sira liu husi sakramento sira ita bele hetan Maromak nia kbiit no grasa no hetan naroman ba ita nia moris sarani. Hau hakarak sai mos se la ba konfessa oinsa sai mos. Tanba ne’e la bele falta iha konfessa no komunga, atu hetan konfessa komunga ita hetan iha to’os laran no mota laran ga? lae so ita hetan iha Igreja. Nune’e mos iha Evangelho Jesus husu ba Pedro, ó hadomi hau liu sira ne’e hotu? Pedro hatan: Na’i ita hatene buat hotu ita hatene katak hau hadomi ita. Ohin Jesus husu ba ita ida-idak, sarani sira imi hadomi Hau ka lae? Se hadomi, loron Domingo ita nafatin ba missa atu simu Jesus iha Eucaristia santa.
Durante ilas papa São João Paulo II nia vizita pre-adolexente sira simu Primeira Komuñaun hamutuk 21, no labarik sira ne’ebe simu Batismu hamutuk 44.
Komunidade FMA – Madre Rosetta Marchese – CASSA
