Venilale – Iha loron 2 Outubru 2022, parokianu sira Sagrado Coração de Jesus Venilale ho entusiasmu simu Sua Eminência Cardeal Don Virgilio do Carmo da Silva SDB, ho formatura kultura nian. Objetivu husi vizita ne’e, mak hamutuk nu’udar Venilale oan hakarak hasa’e hahi no agradese ba Maromak ba grasa no kmanek oioin ne’ebé Na’i haraik ba Kreda Timor, hodi ninia Kardeal rasik no Bibi atan rasik atu tau-matan ba ninia bibi sira.
Iha loron ne’e mós hakarak agradese, ba entrada Irmán Filhas de Maria Auxiliadora na’in tolu ne’ebé tama iha rai Venilale iha loron 2 Outubru 1988 no ohin prezensa iha Timor halo tinan 34.
Iha omilia Don Virgilio foti apóstolu sira-nia liafuan ne’ebé dehan ba Jezús: “ Na’I haboot ami-nia fiar”. Nune’e sua eminência salienta liután katak,atu haburas ita-nia fiar depende ba oinsá hare no oinsá ita komprende ita-nia fiar eh Fé. Fé ne’ebé adesaun ba Kristu ba Maromak ne’ebé mate no moris hias ne’ebé mai ita sarani sira sai verdade ne’ebé absolutu. Laiha verdade eh lialoos ne’ebé boot liu ona duké mai ita sarani sira ne’ebé fiar iha Ita Na’I Jezús Kristu nia terus, mate no moris hias. Nune’e mós hare ba madre FMA sira ne’ebé tama iha Timor tanba ho fiar oitoan ne’ebé iha, ohin loron iha eskola, orfanatu no irmán sira barak, tanba fiar no tanba misaun ne’e Maromak nia projetu.
Hafoin Don Virgilio husu ba ema hotu ne’ebé prezente atu hakas’an laran metin iha Maromak duké konfia iha ninia an. Idak idak haka’as an atu respeita ema seluk nia direitu, respeita malu, hadomi malu, kria paz no dame iha familia laran. Koko atu rona Maromak nia liafuan sei inspira ita hodi moris nu’udar Maromak oan sira.
(Alice Filipe FMA)
