Metódio no Cirilo moris iha Macedónia no sira maun-alin iha raan, iha fiar, iha vokasaun apostólika. Metódio moris iha 815 no Cirilo iha 826. Metódio, sei joven, hetan nomeasaun nu’udar governadór provínsia Macedónia Inferiór, iha-ne’ebé hela ema eslavu sira. Cirilo mós, bainhira sei joven, lori ba estuda iha Constantinopla, kapitál Impériu Bizantinu, iha-ne’ebá mak nia hetan formasaun. Depois nia hanorin filozofia no sai diplomata ba árabe sira.
Ho tinan 38, Metódio husik karreira polítika no sai monje iha mosteiru Bósforo nian. Liutiha tinan ruma nia alin Cirilo mós tama iha vida monástika. Maun-alin na’in rua nia misaun apostólika hahú iha 861, bainhira haruka sira ba misaun konversaun povu eslavu sira-nian.
Saun Cirilo kria alfabetu eslavu foun no tradús Bíblia, Missa, rituál sira no ensinamentu kristaun sira. Nune’e, povu bele harohan, kanta no lee buat hotu iha dalen ka língua rasik.
Iha tempu ne’ebá, testu sagradu sira hetan de’it iha lia-gregu eh lia-latín, labele tradús. Monje Cirilo no Metódio nia inisiativa hamosu konflitu ho monje sira seluk. Relijiozu barak kontra Metódio no Cirilo nia serbisu. Amu-Papa bolu sira ba Roma, iha-ne’ebé sira hetan Papa Adriano II nia apoiu, ne’ebé pesoalmente fó bensan ba livru litúrjiku sira hakerek iha língua eslava.
Cirilo atu simu ordenasaun bispu, maibé iha viajen filafali husi Roma nia mate. Tinan ne’e 896 no Cirilo foin mak iha idade 42 de’it. Ema hakoi iha 14 Fevereiru iha Igreja Saun Clemente, besik Coliseu.
Metódio filafali ba misaun no simu nomeasaun nu’udar arsebispu Panónia nian, ho sede iha Sirmio. Iha viajen daruak ba Roma, iha 885, nia mate.
Papa S. João Paulo II ho Surat Apostólika ‘Egregiae virtutis’ proklama santu na’in rua ne’e patronu Europa nian, hamutuk ho Saun Bento, iha 1980.
