Domenico Savio tama atu halo parte iha oratóriu Don Bosco nian iha Outubru 1854; tempu ne’ebá nia tinan sanulu-resin-rua no sai ba maluk mane sira liufali belun ida. Nia lori ba oratóriu venerasaun ba Na’i-Feto ne’ebé nia hadomi ho domin sinseru no filiál.
Bainhira Papa Pio IX proklama dogma Imakulada Konseisaun iha Dezembru 1854, nia deside atu konsagra an ba Maria ho liafuan simples sira-ne’e: “Maria, ha’u fó ba ita ha’u-nia fuan, halo atu nia sai ita-nian ba nafatin!”
Iha primavera 1856 nia iha ideia atu kria grupu labarik mane sira-nian atu halo hamutuk halo buat di’ak: “sosiedade sekreta” forma husi apóstolu ki’ik-oan sira ne’ebé oinseluk husi sira foin-sa’e sira seluk. “Sósiu” [membru] sira ho Jezús no Na’i-Feto nia tulun, empeña an atu sai di’ak liután no sei hakaa’as an atu habelar laran-kontente no ksolok iha sira-nai sorin-soin.
Nia konvensidu katak atu halo di’ak iha oratóriu sira ne’ebé di’ak liu tenke hamutuk no serví maluk sira seluk! Tanba ne’e nia deside kria grupu sekretu ida: la’ós ba ema hotu maibé atu serví hotu.
Nune’e mak nia funda “Kompañia Imakulada nian” [Compagnia dell’Immacolata], atu fó onra ba Na’i-Feto nune’e mós atu tulun klamar barak atu salva. Finalidade kompañia nian mak asegura Imakulada ninia protesaun hodi to’o ba objetidu prinsipál rua: ezerse no promove prátika sira piedade nian no karidade hodi Maria nia naran no konfesa beibeik.
Don Bosco, haksolok ho ideia ne’e, aprova tiha no sujere atu halo regulamentu ki’ik-oan ida. Nune’e, Domenico konvida belun sira ne’ebé nia konfia liu atu hakerek no mantein segredu. Artigu 21 ne’ebé konklui regulamentu mak sínteze no esprime momoos espíritu kompañia nian: membru sira, aleinde lori ho devosaun medalla ida, sira tenke iha “konfiansa sinsera, filiál, lahó limite ba Maria, iha laran-mamar singulár ba Nia, deovosaun konstante: no tenke sai “domin-na’in ba maluk no hala’o loloos buat hotu”.
Regulamentu fó konsellu atu maun-alin sira ne’ebé adere ba Kompañia “hakerek Jezús no Maria nia naran santu liu uluknanai iha fuan no neon, hafoin iha livru sira no iha objetu sira ne’ebé sira haree.”
Iha 8 Juñu 1856, iha igreja Saun Francisco nian, iha altár Na’i-Feto nia oin membru sira “Kompañia Imakulada” nian promete sira-nia fidelidade ba empeñu ne’ebé sira foti, nune’e inaugura asosiasaun ne’e. Domenico nia mehi sai realidade!
Iha Kompañia, membru ida-idak tenke tau matan ba “kliente” sira ne’ebé, iha sira-nia linguajen sekretu, mak foin-sa’e sira (lahó dixiplina ka fasil atu tolok) ne’ebé sósiu ida-idak tenke sai “anju mahein” to’o nia konsege lori ba dalan loos.
Nune’e, ita bele haree iha ita-nia asosiasaun sira inspirasaun furak no interesante espíritu fraternidade nian no kolaborasaun ba malu no adezaun ne’ebé joven Domenico rasik iha. “Kompañia” [asosiasaun] mak konstante ida karizma salezianu nian, ne’ebé ohin loron kontinua propoin iha ita-nia uma sira hotu, iha oratóriu sira, iha eskola sira. Espíritu hanesan ne’ebé anima Domenico Savio, Don Bosco, kontinua moris atu halibur foin-sa’e sira ho espíritu no hakaran ida, katak, tau matan ba malu, joven sai kampeaun “fraternidade” nian, no hahú baze atu iha futuru harii moris nu’udar “fratelli tutti”.
Ita husu S. Domenico Savio atu inspira ita-nia foin-sa’e sira no ita-nia asosiasaun sira!
Ora pro nobis S. Domenico Savio, ki’ik-oan iha otas maibé boot iha santidade!
