Venilale – Komunidade edukativa Santa Maria Mazzarello (ETV Hotelaria e Turismo) hamutuk ho komunidade edukativa S. João Bosco (Escola Secundária Geral) halo atividade hamutuk iha eventu “Tempu Kriasaun nian”. Atividade ne’e atu sensibiliza kona-ba “Kuidadu ba ita-nia uma komún” ba estudante sira.
Ir Jacinta Gusmão fó hanoin kona-ba “Season of Creation” nu’udar eventu ida tinan-tinan depoizde Papa Francisco hakerek ensíklika “Laudato Si”, kona-ba tau matan ba ita-nia uma komún. Season of creation ka tempu kriasaun nian hahú husi loron 1 Setembru to’o loron 4 Outubru.
Atividade hahú ho jogu kona-ba kompleta fraze bíblika kona-ba Maromak nia liafuan ne’ebé entrega mundu ka kriasaun ba mane no feto, Adão ho Eva atu “
hakonu rai no ukun nia… ukun ikan sira iha tasi, manu sira iha lalehan no balada sira hotu ne’ebé book iha rai” (Gen 1, 28). Husi ne’e Ir Jacinta dehan katak, ukun la dehan “devora”, esplora ho modu egoista, maibé jere, administra, haburas no uza ho di’ak.
Depoizde jogu, estudente ho profesór/a sira fahe tuir klase kahur malu ESSJB no ETVMM no ba hamoos área sira hanesan bee-matan iha Pré-secundária nia okos, área kampu football to’o iha dalan ba pré-semináriu Filippo Rinald no Igreja parokiál nia área. Iha bee-matan nakonu ho plástiku sabaun nian, shampoo nian, no foer seluk tan. Bee-matan ne’e iha bee tinan tomak, no komunidade hotu mai kuru bee iha ne’e atu hemu no te’in, atu h
ariis, atu fase roupa. Iha fatin hotu nakonu ho foer oioin maibé liuliu mak plástiku. Difisil hapara uzu plástiku nian!
Hodi halo serbisu hamutuk, bele mós sai oportunidade atu foin-sa’e sira husi eskola rua ne’e kria amizade ba malu no tempu mai bele serbisu hamutuk tan.
Ami agradese Maromak, tan hotu tiha ami-nia asaun limpeza jerál, udan mós tun atu rega ita-nia “uma” no fó hariis no hemu ba kriasaun hotu. Obrigada Na’i ba Ita-nia prezente liuliu ohin ba “biin udan”!
(JG)
