Venilale – Nu’udar preparasaun atu selebra festa Madre Jerál, Me. Yvonne Reungoat (Superiora Jerál Instituto Filhas de Maria Auxiliadora), ne’ebé realiza iha loron 26 Abril 2018 iha Paraguay, komunidade Madre Mazzarello Venilale, kontinua dalan atu hatoman foin-sa’e sira harohan ho Maromak nia liafuan ka Lectio Divina. Tuir Amu-Papa nia tema ba Loron Mundiál Orasaun ba Vokasaun sira, Lectio ne’e kona-ba pasajen Evanjellu Lucas 4, 16-21. Tema festa Gratidaun Mundiál ba Madre Jerál, “HO FOIN-SA’E SIRA ITA TOKA TALIN MORIS NIAN HODI FÓ SASIN KSOLOK TUIR KRISTU” la’o tuir tema Sínodu foin-sa’e sira-nian iha Outubru mai. Molok halo Lectio, Ir Fabiola aprezenta Amu-Papa nia mensajen ba joven sira: “RONA, DIXERNE NO MORIS VOKASAUN”.
Atividade espirituál ne’e hetan partisipasaun maxíma, tanba ida-idak fahe ninia esperiénsia oinsá mak mundu ohin loron liu-liu foin-sa’e sira hetan difikuldade atu Rona Maromak. Mundu oferese buat barak ne’ebé kria konfuzaun iha foin-sa’e sira nia babukak no dúvida atu foti dezisaun ruma. Maibé sira iha korajen nafatin katak liuhusi fini di’ak ne’ebé sira iha, Maromak sei tau matan atu sai buras no fo fuan iha loron ikus.
Iha loron 26 fulan Abril 2018, hamutuk ho Madre provinsiál, Alma Castagna no ninia konselleira sira, ami selebra hamutuk festa agradesimentu ba Madre Jerál ho selebrasaun Eucaristia ne’ebé prezide husi Amu Kapelaun komunidade nian, Pe. Abrão Pinto SDB. Iha omilia aleinde konvida atu agradese Maromak no harohan ba don Me.Yvonne nian, nia enfatiza mós atitude sira Amu-Papa husu atu deskobre no hala’o moris vokasaun nian: RONA, DIXERNE no MORIS. Nia hateten tan katak ita ne’ebé simu bolu atu akompaña foin-sa’e sira tenke iha kapasidade ou arte ba Rona hafoin ajuda sira atu dixerne no moris sira nia vokasaun ho fidelidade. Atu taka festa ne’e iha lorokraik, hamutuk ho menina sira halo adorasaun ida ba Vokasaun hodi husi atu foin-sa’e hirak ne’e balun bele iha fuan ne’ebé hatene rona, dixerne no hatán ba Na’i nia Liafuan.
Ohin mós konselleira sira hamutuk ho Provinsiál fó avaliasaun ba estudante sira-nia sala-de-aula no traballu resiklajen nian nu’udar konkursu ida husi sira seluk ba “Earth Day” no atu prepara ba festa Madre Mazzarello nian.
(Yasintha H. Bria)
