Dili – Komunidade Balide haksolok tebes iha selebrasaun loron mundial ba misaun nian hodi hatudu misaun FMA nian liuhusi promosaun vokasional no aktividades Exposisaun. Fulan ida molok aktividades ida ne’e komunidade halibur hamutuk hodi koalia konaba dalan oinsa bele halo promosaun vokasional tuir komunidade nia Projetu Komunidade. No ikus hamosu ideia furak atu halo promosaun vokasional ho dalan kriativu. Nune’e ami deside atu selebra Loron Mundial ba misaun iha tinan ida ne’e hodi hatudu karizma salezianu no vokasaun FMA nian liuhusi mós misaun sira ne’ebe komunidade halo.
Atu halo Expo Missio ida ne’e sai furak no atraente ami konvida komunidade FMA sira iha Komoro. Sira simu konvite ida ne’e ho ksolok no pronto atu partisipa iha eventu ida ne’e. Novicias sira prepara Stand ba promosaun vokasional no sasan sira ne’ebe sira halo hanesan terco, lilin; Postulante sira prepara expo liuhusi resiklajen sira no hamosu buat furak oinoin liuhusi kanuru plastic nakfilak ba candle holder, masker uzadu nakfilak ba pasta, feixu nst. Grupu liturjia ida-idak hamutuk ho meninas sira prepara sira nia expo tuir sira posibilidade. Grupu liturjia sira ne’
e halo Bakso, katupa, katupa, sate, es Mojito,ice cream, kripik, pasteis espesial… Expo nee sai furak liutan ho presenza ikipa TOT diriji husi Madre Isaura ne’ebe fa’an hahan italiano: Pizza, Rabioli, spaghetti, Tiramissu nst.
Ami nia Expo hahu tuku 10.00 dader no remata tuku 4.30. Maski visitante sira ladun barak maibé kuaze ami nia sasan ne’ebe fa’an sosa hotu. Ami agradese ba loron ida ne’e ne’ebe hatudu ami nia uniaun nu’udar familia ida. Domin no atensaun ba malu. Agradese ba presenza particular Ambasador Brasil no nia fen ne’ebe sai primeiru visitante ba Expo. No mós ba Ambasciadora Timor Leste ba Malaysia Sra. Joana Amaral ne’ebe borong sasan barak. Iha mós ema estranjeiru balun ne’ebe mai visita pameran ida ne’e. Iha kalan irman no menina sira hotu senti kolen nune’e ami hamoos no tau iha ordem sasan sira ami modifika orario orasaun nian hodi bele ba deskansa lalais hodi hasoru fali loron aban nian ne’ebe nakonu ho aktividade semanal nian. La haluha atu agradese dal aida tan ba kontribusaun no partisipasaun ita ida-idak nian ba susesu EXPO MISSIO 2021.
(AngelFMA)
