Dili, 22 Marsu 2018, Relijiozu/a no mos Seminarista sira Diocese Dili nian ho sarani sira parokia Motael hamutuk ho Bibi atan Diocese Dili nian Don Virgilio do Carmo da Silva, Sdb hasae hahi no agradese ba loron special ne’ebe ohin uma kreda dedika ba Loron Vokasaun nian “ Bom Pastor”
Molok atu tama ba Loron vokasaun Bom Pastor nian, Relijozu/a sira hamutuk ho foinsae no labarik sira hamutuk 400, halibur hamutuk iha igreja Motael hodi reza velada, vespras e adorasaun hamutuk.
Iha misa loron nian, Amo Bispo mos hato’o ninia omilia kona ba modelu “Kristu Bibi atan diak “ mak sai ezemplu diak ba ita ida –idak ne’ebe hanaran an sarani ou Kristaun. Bibi atan diak mak sira ne’ebe fo an atu tau matan no halo diak ba nia destinitariu sira. Papa Francisco mos dehan: Bibi atan diak hatene nia bibi sira nia iis no bibi sira mos hatene bibi atan nia iis. Ezemplu konkretu iha Biblia hatudu bibi atan Israel nian ne’ebe Nai Maromak hili mak Liurai David. Bibi atan diak mak bali nia bibi sira ho fuan ho laran, no mos ho prudensia. Iha Jesus nia tempu Iha mos bibi atan aat iha povo Israel nia leet. Bibi atan aat sira la bali diak sira nia bibi, buka deit interese ba an rasik no ikus mai esplora Maromak nia povo. Sira laos halibur maibe soran fali Maromak nia povo sira. Sira fahe povo nee, no aat liutan sira hakarak no buka povo nia mate. Karakteristika tuir profeta sira nia hare kona ba Bibi atan diak mak ida ne’ebe tau matan e defende no lori nia bibi sira ba fatin ne’be diak liu. Atu aprende sai bibi atan diak laos deit sira ne’ebe hatudu husi liur diak, maibe ida ne’ebe la tauk ou brani, hasoru buat aat hotu maski tenke lakon nia vida. Maski dala barak tenke simu liafuan aat, hetan perseguisaun oin –oin. Buat hotu ne’e lori ita atu hanoin fali Profeta Ezaquel nia lia fuan ne’ebe dehan: “Profeta ida tenke haklaken buat ne’ebe Maromak nia hakarak laos haklaken buat ne’ebe povo gosta”. Maromak nia liafuan dala barak kroat e obriga ita atu bele hadiak an.
M
olok atu tama ba divertimentu Amo Bispo mos hato’o liafuan badak ba Relijiozu/a no mos Seminarista sira katak Pontualidade existe liu ba ita sira ne’e. Povo laos atu mai hein ita maibe ita mak pontual uluk ba sira. Iha formasaun nia laran ita aprende uluk nanain sai ema pontual. Ita hakaas atu atu forma ita nia an sai pontual.
Agradese ba Amo Administrador Motael nian Padre Evaristo Soares, Pr ne’ebe ho ninia inisiativa bele realiza ona festa ne’e ho prezensa relijioso/a no mos Seminarista sira iha loron sabaddu kalan too Domingo ne’e. Ho modo especial ne’e, Amo Bispo agradese tebes ba inisiativa ne’ebe mak foin hahu ne’e. Ida ne’ebe bele hatudu katak loos duni kongregsaun barak iha Dili laran kuaze 50 resin, ho karizma oin –oin. Maromak liu husi Fundador sira ne’e hili no fo Dom ida spesifiku, ba kongregasaun ida-idak atu tau matan, liu –liu ba ema moras, kiak, Ferik katuas e foinsae sira. Karizma oin-oin maibe ita hotu ne’e partilha iha misaun Kristu nian. Ida ne’e mak riku soin no beleza ida uma kreda ninian. Bainhira ita hakaas an atu serbisu hamutuk, ne’e mak hatudu Kristu nia oin iha uma kreda nia laran. Ne’e mak Koperasaun ida ne’ebe sai konkretu hanesan inisiativa ida ne’ebe Amo Evaristo halo dadaun ne’e. Oportunidade ne’e halo Seminarista no Formande sira husi kongregasaun oin-oin bele koñese malu. Ita hotu mai iha ne’e lato’o deit atu reza ka haksolok hamutuk maibe ida ne’e hola parte Formasaun ida. Formasaun ida ne’ebe liu husi halibur hamutuk hahu husi sabadu too fali Domingu. Ita ida –idak hakaas an atu sai husi ita nia fatin ka knuuk sira atu bele hasoru malu ho maluk sira seluk.
Amo Bispo enkoraja mos ba Relijiozo/a sira hodi husu ba responsavel Konferensia Superior Maior sira atu foti konxiensia diak atu haburas fila fali sensu Relijozu nian ida ne’e ba tinan tinan atu hamoris iha Diocese Dili nia laran. Informalmente lansa ona maibe tenke kontinua tinan tinan iha loron ida ne’e, iha loron Domingo Bom Pastor nian. Loron ne’e sei dedika nu’udar loron vokasaun nian ou Bom Pastor nian. Loron nee sai loron dahuluk halibur kongregsaun sira no seminarista sira hotu Diocese Dili nian. Ikus liu taka ho divertimentu husi kongregasaun ida-idak ne’ebe hatudu Vizaun no Misaun Karizma nian ba partisipante hotu. Depoizde de divertimentu partisipante sira ba vizita fatin pameran kongregasaun ida-idak nian Iha fatin hanesan Amo Evaristo mos apresia tebes bainhira tama iha FMA sira nia fatin, iha ne’eba nia hateke ba Don Bosco nia imajen dehan: “Don Bosco haraik mos o nia Espiritu oituan mai hau ba”. Husi espresaun Saleziana ne’ebe Formande no FMA sira hatoo halo ema konhese ita nia karizma mak los duni ba foin-sae sira. Agradese Maromak ba espirito Don Bosco no Madre Mazzarello nian ne’ebe husik hela mai ita nia oan sira nudar riku soin kongregasaun nian ne’ebe hamorin kreda ho Karizma Saleziana.
(Ines Bartolo Freitas)
