Redasaun fmatin
Komunidade lima mak selebra ona festa Madre Mazzarello nian iha loron 9 Maiu 2023, loron moris Madre Mazzarello nian: Fuiloro, Cailaco, Balide, Baucau no Cassa. Ne’e tanba razaun oioin, hanesan iha atividade eskola, iha mós devosaun ba Na’i-Feto Fátima ne’ebé monu iha loron 13 Maiu ka razaun seluk tan.
Selebrasaun hahú ho tríduu. Iha Fuiloro iha Missa no han kalan hamutuk, hafoin menina Asrama hatudu drama Madre Mazzarello nian hodi reflete kona-ba nia moris hahú husi ki’ik to’o realiza misaun ne’ebé Na’i entrega hodi eduka foin-sa’e sira ho estilu Sistema Preventivu.
Iha Cailaco, komunidade komunidade FMA selebra hamutuk ho Oratorianu sira no inan-aman balun. Eukaristia Santa selebra husi Padre Agapito SDB, ne’ebé iha omilia nia konvida labarik sira atu husu tansá imi mai misa, no tansá imi mai oratóriu? Sira hatán ami mai selebra festa Madre Mazzarello nian, iha oratóriu ami reza, kanta, toka, halimar no labele halo sala.
Komunidade Balide selebra hamutuk ho grupu oioin hanesan: ADMA, estudante sira Sentru Formasaun nian, Animadores, Antigus Alunus, Menina Kolejiu, kolaboradores no família balun ne’ebé hela besik. Hahú ho selebrasuan eukarístika ne’ebé sai hun no tutun ba Solenidade ohin nian prezide husi Pe. João Gaspar, SDB. Iha nia omilia nia hateten: “Me. Mazzarello mak Santa ida ne’ebé ho idade foin-sa’e brani ona halo komitmentu radikal atu konsagra-an tomak ba Maromak, Santa ida ne’ebe simples no riku iha Virtude”. Hafoin iha jogu, almosu hamutuk no konvíviu.
Iha Baucau selebra hamutuk ho Família Saleziana no OPIAM ho Santa Missa no konfraternizasaun hamutuk.
Iha Cassa mós selebra ho oratorianu no asosiasaun sira. Estilu salezianu mak sempre envolve foin-sa’e sira iha ksolok.
Iha Festa Main nian hanorin ita pensamentu sira hanesan:
- Bainhira selebra festa Sta.Maria Mazzarello nian ita selebra finalidade moris sarani nian. *
- Husu ita atu banati tuir Main nia valór sira moris sarani nian hanesan badinas, haksolok nafatin, sakrifísiu atu Maromak nia Reinu bele moris iha rai.
Main iha Lalehan harohan mai ami atu sai ema ksolok nain, laran manas iha buat hotu hodi halo buat hotu hodi glória de’it ba Maromak.
Viva Madre Mazzarello!
