Dili – Ho ksolok, Família Saleziana tomak selebra solenidade Maria Auxiliadora nian. Iha uma hotu halo Novena preparasaun nian. Iha komunidade balun halo mós velada no prosisaun sira iha fulan Maiu nia hahú ka durante Novena no vijília festa nian. Ne’e hotu atu hanoin grasa hotu simu husi Maromak liuhusi Na’i-Feto Auxiliadora, no mós atu husu grasa hotu ne’ebé ita presiza. Don Bosco sempre dehan katak, hodi konfia iha Maria ita sei hatene saida mak milagre.
Aleinde momentu sira devosaun, piedade no orasaun nian, iha mós parte desportiva no kompetisaun sira. Iha komunidade sira ho labarik no foin-sa’e sira halo kadi kakutak kona-ba Na’i-Feto nia moris, nune’e bele koñese liután nia. Iha parókia Maria Auxiliadora, Dili mós organiza kuiz nivel zonál ka kapela sira ne’ebé hola parte ba parókia ho objetivu hanesan.
Iha mundu salezianu iha Timor-Leste, iha Santuáriu Maria Auxiliadora, ne’ebé tinan-tinan nafatin iha sai sentru peregrinasaun ba grupu hotu Família Saleziana no sarani sira devotu ba Maria Auxiliadora. Nune’e, komunidade sira hela iha Dioseze Baucau, sempre hola parte ba peregrinasaun ba Valdocco Timor nian, katak Fatumaka.
Maski iha festa iha Fautmaka, nafatin iha selebrasaun iha kada parókia ka uma saleziana sira. Ita konvensida katak laiha Maria laiha Jezús, no la iha Jezús, la iha salvasaun.
Ita buka kuda devosaun ba Maria iha fatin hotu ita horik bá. Ita iha Inan ida ne’ebé la husik ita mesak, basá nia prezente nafatin iha ita moris, intersesora, medianeira ba Jezús, hanesan nia halo iha festa kazamentu iha Kaná Galileia nian.
(Redasaun fmatin)
