Dili – Iha loron 24/6/2017 escola Maria Auxuliadora selebra solenidade são João Baptista nia moris no komemora mos 24 loron Nain feto Maria Auxiliadora nian.Estudantes, professores no trabalhadores misa hamutuk iha Gym escola Maria auxiliadora; padre selebrante mak padre Gui da Silva SDB. Molok atu tama omilia padre halo pergunta ruma ba estudante sira hado husu kona ba festa boot ne’e sé nia festa loos. estudante sira hatan: festa São João Baptista nian.
Iha padre nia omilia nia hato’o topiku rua mak hanesan: Istoria são João Baptista nia moris no Misaun São João Baptista nian.
Padre subliña uluk istoria São João Baptista nia moris, nia dahan : “molok João moris iha konfuzaun boot ida iha ema barak nia hanoin; oinsa joão bele moris se nia inan ho aman ferik no katuas hotu ona no otas atu kous mos liu ona. ema kolia bar-barak kona ba akontesementu ida ne’e; maibe maromak taka ema nia ibun hodi hatudu Nia kbiit ba ema katak ba ema la bele maibe ba Maromak buat hotu bele deit , hodi haree ho matan fiar nian, basa maromak nia planu ne’e misteriu boot teb-tebes ita ema la bele komprende tomak.bNune’e João moris tuir Maromak nia hakarak hodi hakonu iha nia Maromak nia Grasa no nia Kbiit iha nia moris tomak. parte Segundo kona ba São João Baptista nia Misaun. Nia mai uluk atu hadia fatin no dalan sira ne’ebe kleuk no husu mai ita atu hakmatek kalma hodi rona Maromak koalia mai ita ida idak, atu halo ita nia situasaun hakmatek, nonok atu rona no simu Jesus iha akomtesementu hotu iha ita nia moris lor-loron nian.Tuir mai padre husu tan: ohin loron Jesus sei mai ka lae no mai iha ne’ebe? estudante sira hatan: sim sei mai iha eukaristia iha ita nia fuan no mai iha ita nia moris loron-loron. Nune’e padre dehan:Jesus mai iha sakramentu hotu. Nia dehan tuir ema matenek sira nia hanoin kona ba eukaristia ne’ebe dehan: ET OPERA OPERATOR katak Maromak nia grasa ne’ebe halo paun no tua sai Jesus nia isin no ran, ne’ebe ita simu iha ostia konsagrada. Nune’e mos ita hirak ne’ebe iha ne’e halao hele João Baptista nia misaun, hanesan inan aman sira akompaña oan sira ba misa ba eskola, professores prepara hanorin estudante sira atu sai sarani ne’ebe diak no sidadaun ne’ebe onestu tuir São João Bosco nia lia fuan.
Ikus nia Padre husu ba estudante no ema hotu atu reza ba ita nia nai ulun sira ne’ebe halao hela kampaña parlamentar, atu sira bele ukun lolos, koalia buat ne’ebe loos halo buat ne’ebe diak, hodi bele moris tuir S. João Baptista nia ezemplu diak sira hodi defende lialoos , no taka ho Ave Maria tolu.
Tempu hanesan, grupu assosiasaun Laura Vicuña primeira vez halao visita ema kiak sira iha fatin periferia iha Beduku- Hum-Buti ne’ebe hola parte iha parokia maria Auxiliadora, fatin ne’ebe durante ne’e ami ajuda. Laos deit visita maibe fahe mos Biblia, Hananu ba Nai, no Ha’u Fiar ba familia tolu iha fatin refere. Familia sira kontente liu ho madre no labarik sira nia prezensa husi grupu ne’e Madre Domingas mak akompaña grupu ne’e.
(Grinalda da Costa)
