Baucau – Maromak nafatin laran-sadia mai ita ema sira. Loroloron Nia kontinua bolu ema ba konversaun liuhusi nia Liafuan no Sakramentu sira. Liuliu iha tempu Kuarezma, iha loron ikus sira atu tama ona ba festa Páskua, Komunidade Edukativa FMA hetan konvite atu halo parajem ida hodi hateke ho fiar ba Páskua Na’i nian. Iha Jezús Kristu nia mate mak realiza mistériu salvasaun nian: mistériu fiar nian atu fiar, atu moris iha fidelidade ba Na’i Moris-Hi’as no ba Ninia Liafuan santu.
Nune’e, mak ohin, 26 Marsu loraik, membru sira komunidade edukativa, animadór/a sira, inan-aman, katuas-ferik no família sira iha zona Teulale hetan oportunidade atu halo selebrasaun penitensiál no konfisaun. Selebrasaun hahú ho introdusaun husi Ir Jacinta Gusmão kona-ba signifikadu Páskua nian, fó hanoin mós kona-ba oinsá halo ezame konxiénsia nian no konfisaun loos. Hafoin hahú momentu orasaun hodi invoka Espíritu Santu, rona Maromak nia Liafuan. Tuirmai partisipante sira fahe ba grupu haat hamutuk ho Irmán ida-idak atu halo reflesaun no partilla ba Maromak nia Liafuan foti husi ai-kanoik osan nian (Mt 25,13-30). Irmán sira tulun grupu sira atu sai familiár ho Maromak nia Liafuan no gia sira atu konfronta an rasik ho Maromak nia Liafuan, hanesan pontu sira tuirmai ne’e:
Kona-ba ha’u-nia rikusoin: ha’u hatene rekoñese katak buat hotu ha’u iha mak Maromak nia prezente? Bainhira ha’u hanoin ba sasán ne’ebé ha’u iha (uma, belun sira, osan…), ha’u agradese Maromak ne’ebé liuhusi ema sira “haraik mai ha’u” prezente sira ne’e hotu ka ha’u hanoin katak ha’u tenke simu no buat hotu depende ba ha’u-nia kbiit?
Kona-ba ha’u-nia tempu: Ha’u uza ha’u-nia tempu ba saida? Ha’u estraga de’it tempu? Ha’u uza ha’u-nia tempu ba ha’u-nia an rasik ka ha’u hatene fó tempu nia parte ida ba ema seluk?
Kona-ba ha’u-nia ta’uk sira: Ha’u hatene rekonñese don/kbiit ne’ebé Na’i hakonu ha’u-nia moris (intelijénsia, kapasidade atu rona, domin, pasiénsia, don atu komprende sasán sira…)? Ha’u uza ba ema seluk? Ta’uk sá de’it mak la husik ha’u atu tau ha’u-nia kbiit sira atu serví ema seluk? Ha’u mak ema ida ne’ebé ko’alia no hasai komportamentu saruntu de’it eh la kontrola an ka ha’u buka atu hanoin ba konsekuénsia sira husi ha’u-nia liafuan no komportamentu/hahalok?
Kona-ba relasaun ho an rasik, atan di’ak loos no fiél: Ha’u hatene rekoñese salan sira ne’ebé ha’u halo? Ha’u hanoin ha’u mak iha razaun eh loos nafatin? Ha’u halo buat ruma ne’ebé bele halo aat ba ha’u-nia isin no ha’u-nia klamar? Ha’u halo ha’u-nia devér sira (iha uma, eskola, serbisu eh kompromisu ne’ebé foti …)? Ha’u halo buat ruma atu sai di’ak liután?
Kona-ba ha’u-nia relasaun ho maluk sira, ne’ebé entrega mai ha’u: Ha’u hatene atu perdua? Ha’u hatene husu perdaun eh husu deskulpa? Ha’u rai hirus hasoru ema ne’ebé hakanek ha’u eh halo salan hasoru ha’u?Ha’u hatene halo sakrifísiu ba ema ne’ebé moris ho ha’u, hamutuk ho ha’u? Ha’u ko’alia aat beibeik (tolok) eh hanoin aat kona-ba ema seluk? Ha’u hatene pasiénsia ho ema ne’ebé la hanoin hanesan ha’u?
Kona-ba ha’u-nia relasaun ho Maromak, ha’u-nia Na’i: Ha’u tau Maromak iha ha’u-nia moris nia sentru? Durante ha’u nia loron tomak, ha’u hanoin Nia? Iha ha’u-nia hilin sira ha’u husu sá loos mak Maromak hakarak husi ha’u? Ha’u fó tempu ida ba Nia iha ha’u-nia loron tomak? Ha’u respeita loron Domingu no loron santu?
Orasaun iha grupu remata ho agradesimentu ba Na’i, hafoin ida-idak hakbesik ba amlulik atu halo konfisaun individuál.
