RV – Depoizde komenta, iha audiénsia jerál ikus sira kona-ba ai-kanoik sira mizerikórdia nian iha Bíblia, iha kuarta 8 Juñu, Papa Francisco dedika katekeze ba milagre dahuluk Jezús nian, “sinál dahuluk” ne’ebé hatudu nia glória: milagre kazamentu Caná nian.
Papa Francisco destaka katak, iha okaziaun ne’ebá, Jezús manifesta an nu’udar Maromak nia Povu nia kaben no profundidade relasaun nian ne’ebé kesi ema ho Nia: aliansa domin nian amor.
“Vida sarani mak resposta ba domin ne’e, nu’udar istória ema na’in rua ne’ebé apaixona malu, Maromak no ema, ne’ebé hasoru malu, selera no hadomi malu, hanesan loloos doben mane no doben feto ‘Cântico dos Cânticos”, iha Testamentu Tuan. Igreja mak família Jezús nian, iha-ne’ebá mak Nia tau nia domin; domin ne’ebé Kreda rai di’ak no hakarak fahe ba ema hotu”.
Maria nia papél
Iha festa kazamentu Caná, Maria observa katak falta tua, basá lahó nia festa la iha ksolok ne’ebé naresin. “Imajina tok se festa remata ho xá. Sei moe! Tua ne’e buat ida nesesáriu”, Amu-Papa komenta.
Papa Francisco resalta mós Maria nia fraze ba servidór sira: “Imi halo buat hotu ne’ebé Nia haruka”. Tuir Amu-Papa, ne’e mak liafuan ikus Maria husik mai ita hotu nu’udar eransa/liman-rohan. No defaktu, Bainhira Jezús dehan “Hakonu kusin sira ho bee no lori ba enkarregadu festa nian”, hotu-hotu obedese Nia.
“Serví Na’i signifika rona no tau iha prátika ninia Liafuan. Maromak nia Inan nia rekomendasaun simples, maibé esesniál, mak programa moris ema sarani nian. Ba ita ida-idak, hemu husi kusin ne’e sekivale konfia iha Maromak no esperimenta ninia efikásia iha moris”.
Iha nafatin tua di’ak ba salvasaun
Hodi remata, Amu-Papa dehan katak, hanesan iha okaziaun ne’ebá Jezús rai tua di’ak ba festa nia rohan, Na’I kontinua rezerva tua di’ak ba ema sira nia salvasaun.
“Kazamentu Caná nian buat ruma boot liu duke relatu simples Jezús nia milagre dahuluk. Iha Caná, Jezús kesi ninia eskolante sira ho Nia ho aliansa foun no definitiva; sira sai ninia família e no iha-ne’ebá moris Kreda nia fiar. Ita hotu simi konvite ba festa ne’e, basá tua foun nunka falta!”, Papa Francisco remata.
