RV – Moras mak aspetu komún família barak nian no konstitui esperiénsia frajilidade umana nian, Papa Francisco hateten iha katekeze kuarta, 10 Juñu nian, dedika ba relasaun entre família sira no situasaun moras nian.
Amu-Papa rekoñese katak, iha moras nia oin, bele mosu problema sira iha família nia larantanba frakeza umana. Maibé, enjerál, períodu moras nian aumenta ligasaun familiár nia kbiit. “Ha’u hanoin importante tebes eduka oan sira husi ki’ik kedas ba solidariedade iha períodu moras nian. Edukasaun ida ne’ebé poupa kontaktu ho moras halo fuan sai kiak”.
Dala barak, Papa Francisco dehan, fasil liu ba aman-inan sira suporta moras rasik duké oan ida nian. Nia define nu’udar “eroízmu haksumik ida” esforsu aman-inan barak nian ne’ebé hadeer ka;an atu tau matan ba oan eh katuas/ferik ne’ebé moras no, iha loron tuirmai, ho oras uitoan de’it atu toba, sira tenke bá serbisu.
Iha kazu barak, nia hatutan, ospitál besik liu mak família rasik. “Ohin loron, iha parte barak mundu nian, ospitál mak priviléjiu ida ba uitoan de’it. Inan, aman, maun no biin-alin sira mak garante kuidadu no tulun atu sai isin di’ak”. Inan sira, ho modue spesiál, luta ba oan sira, Papa Francisco resalta.
Amu-Papa temi mós pasajen ruma Evanjellu nian ne’ebé haktuir Jezús nia enkontru ho moras sira, hodi fó hanoin katak Kristu nunka rekuza kura no fó orden no kbiit ba nia dixípulu sira atu halo hanesan. Ne’e mós mak Kreda nia knaar: tulun no hakmaan moras sira iha prátika, maibé mós iha orasaun sira. “Ita labele, nunka la halo orasaun ba moras sira. Eh di’ak liu, ita tenke harohan liután, pesoalmente, nune’e mós iha komunidade”, nia husu.
