Domingu Resurreisaun Na’i nian
Liturjia domingu ne’e nian selebra ressureisaun no garante ita katak moris iha plenitude mak rezultadu husi ezisténsia ida halo iha don no servisu ba maun-alin sira. Resurreisaun Kristu nian mak ezemplu konkretu ne’ebé konfirma buat ne’e hotu.
Leitura dahuluk aprezenta ezemplu Kristu nian ne’ebé “liu iha mundu hodi halo di’ak” no ne’ebé, tanba domin, saran An ba mate; tanba ne’e, Maromak halo Nia moris hi’as. Eskolante sira, fó sasin kona-ba dinámika ne’e, tenke haklaken “dalan” ne’e ba ema hotu.
Evanjellu koloka ita iha atitude rua nia oin hasoru moris-hi’as: ida eskolante ulun-toos, ne’ebé lakohi aseita, basá tuir ninia lójika, domin totál no doasaun moris nian nunka bele hahoris moris foun nian; no ida eskolante ideál nian, ne’ebé hadomi Jezús no, tanba ne’e, komprende Ninia dalan no proposta (la eskandaliza no la hakfodak katak husi krús bele mai moris nakonu, moris loos).
Leitura daruak konvida sarani sira, ne’ebé iha Batizmu simu hatais Kristu nian, atu kontinua dalan vida foun nian to’o transformasaun nakonu (ne’ebé akontese bainhira, liuhusi mate, ita hakat liu barreira ikus ita-nia moris iha rai).
