Liturjia domingu ne’e nian selebra moris-hi’as no garante mai ita katak vida iha plenitude mai husi ezisténsia ida halo nu’udar don no servisu ba maun-alin sira. Kristu nia moris-hi’as mak ezemplu konkretu ne’ebé konfirma buat ne’e hotu.
Leitura dahuluk aprezenta Kristu nia ezemplu ne’ebé “liu iha mundu ne’e hodi halo di’ak” no tanba domin, saran An to’o mate; tan ne’e Maromak halo nia moris hi’as. Eskolante sira, sasin kona-ba dinámika ida-ne’e, tenke haklaken “dalan” ida-ne’e ba ema hotu.
Evanjellu tau ita iha atitude rua nia oin hasoru moris-hi’as: ida mak eskolante ulun-toos ne’ebé lakohi simu nia, tanba tuir nia lójika, domin totál no doasaun moris nian nunka bele hahoris moris foun; eskolante ideál, ida ne’ebé hadomi Jezús, komprende ninia dalan no ninia proposta – no nia la moe no la hakfodak katak husi krús moris mai vida nakonu, moris loos.
