Dili – Atu husik tinan 2015, iha loron kuarta ( 30 Dezembru 2015) Irmán sira husi Komunidade FMA Balide foti inisiativa atu ba vizita kiak sira iha Tibar hodi fahe ksolok Natál nian ho foin-sa’e sira ne’ebé iha sikun ida iha Tibar nia sorin ( fatin soe foer sidade Dili nian)
Haree ba labarik / foin-sa’e sira nia moris loos duni dezafia ita, tanba sira mak foin-sa’e feto no mane ne’ebé ho idade tinan 8 to’o 14 presiza tebes ita nia tulun. Sira ne’e maioria eskola iha primária no mos Pre-secondária. Sira ne’e mai husi família kiak maibé sira nia fuan nakonu ho ksolok, tanba bele haree kedas husi sira nia oin hatudu ksolok bainhira ami to’o iha sira nia leet. Sira nia espresaun dala uluk dehan mai ami mak ne’e: “agradese ba madre sira tanba bele haree hetan ami iha fatin izoladu ida ne’e hodi mai to’o iha ami nia fatin ( fatin foer nian)”.
Komunidade maski iha atividade barak iha uma maibé ami mos husik ami nia tempu ruma atu bele mai hasoru sira iha fatin ne’ebé sira hela ba. Ho moris ne’ebé haree diretamente bele book ita nia laran atu sai husi ita nia fatin ou palásiu ba hasoru kiak sira iha sira nia hela fatin, ne’e mak periferia ne’ebé hein ita nia ida-idak nia kontribusaun atu fó liman ba sira hodi to’o iha sira nia hela fatin hanesan Papa Francisco husu ita atu sai no ba iha periferia.
Foin-sa’e sira ne’e nia atividade loroloron mak hein kareta sira ne’ebé lori foer tama iha kompaun nia laran, sira halai kedan ba buka e foti sasan sira ne’ebé sira presiza. Atividade ne’e sira halo iha tempu ne’ebé sira sai husi eskola, maibé agora iha tempu férias nia laran , tempu tomak sira hela de’it iha fatin foer nian to’o kalan mak fila. Haree ba sira-nia situasaun saude nian barak mak mear tanba foer no mos ahi suar ne’ebé sira enfrenta loroloron. Ne’e mak periferia ne’ebé presiza ita nia ajuda atu sira bele sai husi fatin foer nian hodi moris normál hanesan ema baibain.
Mai ita hamutuk deskobre liután foin-sa’e kiak barak ne’ebé ita seidauk haree hetan hodi ba to’o sira nia fatin hodi deskobre Kristu nia oin iha foin-sa’e kiak sira ne’ebé ita hasoru.
(Ines Freitas)
