RV/Redasaun – Iha audiénsia kuarta 13 Dezembru, Amu-Papa Francisco foti fali tema Missa nian ba ninia katekeze. Pergunta ne’ebé sai títulu ba katekeze mak “Tanba sá bá Missa iha domingu?” Importánsia selebrasaun eukarístika domingu nian “atu hasoru Na’i moris-hi’as, eh di’ak liu atu husi Nia hasoru ita, rona Ninia Liafuan, habosu an ih Ninia Meza, nune’e sai Kreda”.
Tanba motivu ne’e mak domingu loron santu ida mai ita, santifikasaun liuhusi selebrasaun eukarístika, prezensa moris Na’i nian iha ita nia leet no mai ita. Nune’e, Missa, mak halo “domingu kristaun”! Domingu kristaun hadulas haleu Missa. Sá loos mak domingu ba sarani ida ne’ebé falta iha enkontru ho Na’i?
Missa fó forsa no esperansa
Konsíliu Vaticano II define Missa nu’udar mós “loron ksolok nian” no loron “abstensaun serbisu nian”, ne’ebé la eziste iha sosiedade antiga sira molok kristianizmu. Amu-Papa Francisco subliña:
“Sentidu kristaun atu moris nu’udar oan sira no la’ós nu’udar atan sira, anim ahusi Eukaristia, mak halo domingu – kuaze universalmente – loron deskansu nian”. Lahó Kristu ita kondenadu atu kolen loroloron nian domina ita, ho ninia preokupasaun sira, no ta’uk ba loron aban nian. Enkontru dominkál ho Na’i mak fó forsa atu moris loron ohin nian ho konfiansa no korajen no bá oin ho esperansa”.
Maibé la to’o hadomi maluk sira? Tanba sá presiza bá Missa?
Papa Francisco hatán ba objesaun ida ema barak uza, katak “la serve atu bá Missa, domingu mós lae, tanba importante mak mori sdi’ak, hadomi maluk sira”. Loos duni, nia afirma, “katak kualidade moris sarani nian sukat ho kapasidade hadomi nian”, maibé “oinsá ita bele pratika Evanjellu se la atinji enerjia ne’ebé presiza atu hadoi husi bee-matan Eukaristia nian?” No Amu-Papa remata:
“Ita sarani sira presiz apartisipa Missa domingu nian tanba ho Jezús nia grasa de’it, ho Ninia prezensa moris nian iha ita no iha ita leet, mak ita bele tau iha prátika ninia ukun-fuan, no nune’e sai sasin kredivel”.
