Venilale – Komunidade Madre Mazzarello. Bazeia ba rezolusaun Governu nian ne’ebé mantein impozisaun serka sanitaria bandu movimentu ema nian, inklui movimentu estudante ba eskola hahu husi loron 16 Marsu to’o 29 Marsu. Nune’e irmán sira komunidade nian deside halo orariu no atividade ba menina interna sira durante lockdown.
Atividade ne’ebé hala’o mak; loron-loron kada klase troka malu halo Adorasaun Santissimo hamutuk ho irmán sira, hodi tau intensaun ba pandemia Covid-19. Hafoin iha mós oportunidade ba irmán sira atu bele ense hodi haklean lisaun sira ne’ebé hanorin (Portugues, Ingles, Melayu, Relijiaun, Tetun no Saude/Higine). Aleinde ne’e, iha mos tempu halo limpeza atu ambiente moos nafatin. Ikus liu mak aproveita tempu ne’e hodi haburas mos talentu/ kapasidade liu husi : Suku, Toka viola no aprende knananuk.
(Alice Filipe)
