Ohin iha Inspetoria Santa Maria Domingas Mazzarello – TIN; formande sira husi etapa formasaun inisial to’o Novicia no irman juniora sira hotu, halibur hamutuk iha salaun TOT hodi tuir work shop ida ho nia titulu “Tempu to’o ona atu halakan fali ahi” tamba tinan ida ne’e mak tinan dahuluk nu’udar Institutu la’o hela iha dalan preparaun trienal ba selebrasaun tinan 150 espedisaun missionaria dahuluk ne’ebé sai husi knua Mornese hodi la’o ba kari fini Evanjellu iha Terra del Fuoco. Orador sira ba work shop ida ne’e mak madre Evangelina da Costa Xavier, FMA no madre Sebastiana Soares Costa, FMA.
Etapa sira ba work shop ne’e mak tuir mai: Bem-vinda no observa stand no dezeñu sira, orasaun, fahe partisipante sira ba grupu, aprezenta dokumentu sira hanesan Madre Jeral nia lia menon sira kona ba misaun, rona irman missionaria Timor oan sira nia lia menon kona ba misaun, biografia irman missionariu dahuluk na’in 6 nian, servisu iha grupu no aprezenta, kada grupu aprezenta ida-idak nia impeñu sira. 
Nu’udar salesiana foinsa’e ka juniora no mos sira ne’ebé forma-an atu sai salesiana; sira ne’e mak rikusoin Institutu nian ne’ebé sei kontinua hatutan karisma salesiana husi jerasaun ba jerassaun; tan ne’e, irman formadora sira liu-liu sira madre na’in rua ne’ebé naran temi ona iha leten, oferese sira nia-an tomak ho domin no sakrifisiu hodi prepara materia sira kona misaun nian atu tulun irman foinsa’e sira no formande sira atu aprende no konsiente katak misaun mak identidade Filhas de Maria Auxiliadora nian. Atu lori fini Evanjellu ba fatin foun ho nia kultura ne’ebé a’as, ne’e la fasil: maibe Institutu kontinua hanorin Ninia oan sira ho formasaun sira, transmete ba sira ksolok sasin moris irman dahuluk sira nian, sira nia aten brani, laran manas no saran-an total ba Na’i hodi sai modelu santidade nian mai ita ida-idak.
Husi work shop ne’e tulun tebes ami ida-idak hodi dehan ba an rasik hau mak missionaria ida tamba nu’udar sarani wainhira simu ona Batismo, ita hotu simu bolu atu ba haklaken Kristu ba ema seluk. Atu sai missionaria Kristu tenki sai sentru iha buat hotu; tan ne’e missionaria ida-idak tenki hatais iha nia-an Kristu nia virtude sira, atu nune’e fini Evanjellu nian bele buras no ema hotu ne’ebé rona no simu Liafuan mak sai membru fiar nian iha uma kreda ida Jesus Kristu nian.
Sr. Domingas da Silva,FMA
