RV – Iha alokusaun molok harohan Angelus iha Domingu daruak Adventu nian, Papa Francisco husu hateten katak “liturjia hatama ita iha João Batista nia eskola ne’ebé prega batizmu ida konversaun nian ba perdaun salan sira-nian”.
Amu-Papa konvida ema hotu atu halo pergunta tuirmai: “Tebes duni katak iha situasaun oioin no sirkunstansia sira moris nian ita iha sentimentu sira hanesan ho Jezús nian? Porezemplu, bainhira ita sofre injustisa ida eh afornta ida, iha konsege reajen lahó ressentimentu no perdua ho fuan ema ne’ebé husu deskulpa?”.
Vida tuir Evanjellu
Papa Francisco hateten tan katak João Batista nia lian sei hakilar iha rai-fuik maran atuál sira umanidade nian, katak neon no fuan sira ne’ebé taka no toos no lori atu husu se efetivamente ema sira la’o dalan ne’ebé justu, moris iha vida ida tuir Evanjellu.
“Ohin, hanesan tempu ne’ebá, nia fó hanoin ita ho Profeta Isaías nia liafuan sira: ‘Prepara Na’i nia dalan”, Amu-Papa dehan hodi hatutan katak ida-ne’e mak konvite urjente ida atu loke fuan no akolle salvasaun ne’ebé Maormak hakarak oferese kontinuamente, maski ema lakohi.
“Tanba Nia hakarak ita livre husi moris-atan salan nian. Maibé testu profeta nian haboot lian ne’e, hodi fó sai antes katak ema hotu sei haree Maromak nia salvasaun. Salvasaun ne’e ba ema hotu, povu hotu, la esklui ema ida. Ema ida labele dehan mai ita: Ha’u santu, ha’u perfeitu, ha’u hetan ona salvasaun. Ita tenke simu nafatin oferta salvasaun ida-ne’e. Tanba ne’e mak ihaTinan Mizerikórdia nian: atu la’o iha dalan salvasaun ida-ne’e, dalan ne’ebé Jezús hanorin mai ita. Maromak hakarak atu ema hotu hetan salvasaun liuhusi Jezús Kristu, mediadór ida mesak”.
Tuir Papa Francisco, ema ida-idak simu bolun atu haklaken Jezús ba sira ne’ebé seidauk koñese Nia, Ida-ne’e la’ós proselitizmu. Ida-ne’e katak loke odamatan ida. Susar ba ema ne’ebé la haklaken Evanjellu.
“Se Na’i Jezús muda ita, tanba sá ita la sente dezeju atu haklaken Nia ba sira ne’ebé ita hasoru iha serbisu, iha eskola, iha bairru, iha ospitál, iha fatin sira enkontru nian? Se ita hateke hale’u ita, iha hetan ema sira ne’ebé dispostu atu hahú dalan ida fiar nian, se sira hasoru sarani sira ne’ebé hadomi apaixonadu ba Jezús”.
Papa Francisco konvida ema hotu atu kuestiona an rasik: “Ha’u apaixonadu ba Jezús? Ha’u konvensidu katak Jezús oferese no fó salvasaun mai ha’u?”
“Se ha’u apaixonadu ha’u tenke haklaken Nia, maibé ita tenke aten-barani no hatuun foho sira loko-an no rivalidade nian, hakonu rai-kuak sira ne’ebé indiferensa no apatia halo, haloos dalan sira ita-nia baruk-teen nian no ita-nia kompromisu sira-nian”.
Papa Francisco taka hodi husu Na’i-Feto atu tulun ema hotu harahun barreira no obstákulu sira ne’ebé impede konversaun no salan bá to’o Na’i. “Nia de’it mak bele realiza ema nia esperansa hotu”.
