Papa Francisco iha fulan Juñu 2020, iha loron Na’i-Feto nia futar Fuan Sala-Laek, hatama invokasaun foun tolu ba Na’i-Feto iha ladaiña Na’i-Feto nian. Títulu foun sira-ne’e mak : “Mater misericordiae” (Mãe de Misericórdia / Inan Mizerikórdia nian); “Mater Spei” (Mãe de Esperança / Inan Esperansa nian); “Solacium Migrantium” (Conforto dos Migrantes / Konfortu Migrante sira-nian).
Títulu foun sira ba Na’i-Feto mak : “Mater misericordiae (Mãe de Misericórdia / Inan Mizerikórdia nian); “Mater Spei” (Mãe de Esperança / Inan Esperansa nian); “Solacium Migrantium” (Conforto dos Migrantes / Konfortu Migrante sira-nian).
Hodi aumenta tan tolu, Ladaiña Lauretana nia invokasaun sai 55: “Peregrina iha mundu ba Santa Jerusalém iha lalehan, atu haksolok komuñaun haketak-laek ho Kristu, Nia Kaben no Makso’in, Kreda la’o tuir dalan istória nian hodi laran-metin ba Nia ne’ebé fiar iha Na’i nia liafuan”.
Ita hatene husi Evanjellu katak Jezús nia eskolante sira aprende, husi Kreda nia inísiu kedas, atu hahí ida-ne’ebé “rahun-di’ak liu feto hotu-hotu” no konfia iha ninia intersesaun materna. Títulu barak no invokasaun wain ne’ebé piedade kristán, iha sékulu sira, fó ba Maria, dalan privilejiada no segura ba enkontru ho Kristu. Iha tempu ohin mós, ne’ebé lakon dalan no iha inserteza laran, devotu sira halai ba Nia, nakonu ho domin no konfiansa. Ba invokasaun dahuluk, Inan Mizerikórdia nian, tenke resita depoizde invokasaun Inan Kreda nian; Inan Esperansa nian, atu resita depoizde invokasaun Inan Divina Grasa nian, Konfortu migrante nian, depoizde invokasaun Refújiu maksalak sira-nian.
Ho insiativa ida-ne’e, Amu-Papa hatán ba klamar sira ne’ebé harohan, ne’ebé iha tempu difisil no susar ne’e, saran sira an ba Virjen Maria nia protesaun. Nune’e, Kreda konvida ita atu halo sai ita-nian rikusoin mai husi dispozisaun folin boot ne’e no halo atu sarani sira hatene no harohan.
Amu-Papa barak deside atu inklui invokasaun sira iha Ladaiña sira, tuir atualidade moris nian, porezemplu, Papa S. João Paulo II aumenta invokasaun “Liurai-Feto família nian” (Rainha da família). Sira hatán ba momentu reál, momentu ida ne’ebé aprezenta dezafiu ba ema sira. Rozáriu, ita hatene, mak orasaun ida ho kbiit boot nune’e, iha momentu ida-ne’e invokasaun sira ba Virjen Maria importante liu ba ema ne’ebé terus ba Covid-19 no, entre sira-ne’e, migrante sira ne’ebé husik sira rain”.
