Dili – Loron 3 Dezembru, memóra S. Francisco Xavier nian, Irmán Diretora komunidade nian no Konselleira inspetoriál sira halo enkontru formativu loron tomak, iha Uma Provinsiál, Comoro/Dili. Diretora no Konselleira iha Indonesia mós tuir online.
Enkontru fahe ba parte rua. Iha dadeer iha tópiku husi Maromak nia Liafuan kona-ba “Tua foun no Kusin foun” (kf Mt 9, 16-17). Tópiku daruak iha loraik, kona-ba “Responsabilidade tranzmisaun karizma nian”, “A te l’affido” husi jerasaun ba jerasaun.
Ir Alma Castagna FMA, Provinsiál mak fasilita enkontru ne’e. Iha parte dahuluk, depoizde aprezentasaun pasajen husi Evanjellu Mateus 9, 16-17, Irmán sira iha tempu atu reflete pesoalmente no hafoin sira ba iha grupu ki’ik atu sharing. Sharing bazeia ba pergunta sira tuirmai ne’e: 1) Iha tempu pandemia nian, ha’u aprende saida kona-ba ha’u-nia knaar nu’udar diretora?; 2) Iha buat ruma foun ha’u propoin ba komunidade? 3) Ha’u sente katak komunidade “hatais” ábitu loos ba tempu ida-ne’e, ka ita-nia atividade sai atrazadu, ladún hatán ba ezijénsia tempu ida-ne’e nian?
Ita presiza komprende t
empu ne’ebé ita moris daudaun bá, hodi rona ninia dinámika hotu. Hafoin presiza halo diálogu ho Evanjellu hodi foti responsabilidade atu “hatais ábitu eskolante nian” ne’ebé ho konxiénsia bele dehan katak adekuadu liu ba tempu ida-ne’e. Ita eskolante loos duni, se ita loroloron haka’as an atu fó isin ba Evanjellu, hodi husik Espíritu Santu sujere modalidade no ritmu adekuadu liu. Tempu pandemia nian mós ezije mai ita atu la metin iha “prátika” sira, maibé dosil ba Espíritu no fiél ba prinsípiu Inkarnasaun nian. Ba ne’e presiza dixernimentu, sabedouria evanjélika.
Iha parte daruak, tópiku reflesaun lori Irmán Diretora sira atu reflete kona-ba responsabilidade ne’ebé sira simu atu “rai no dezenvolve karizma”, atu tranzmite karizma ho fidelidade. Ba ne’e presiza kondisaun ruma hanesan ksolok kona-ba vokasaun rasik; moris espirituál kle’an; koñesimentu kona-ba Fundadór sira no karizma nia dezenvolvimentu; halo karizma nabilan ohin loron iha Kreda. Iha momentu reflesaun nian iha mós pergunta ida atu hanoin: “estratéjia sá de’it ita presiza iha atu tranzmisaun karizma sai efikás?”
Depoizde reflesaun pesoál, sharing iha grupu ki’ik, ikusmai aprezenta iha asembleia. Buat importante atu moris iha tempu foun ohin nian mak “dixernimentu” nune’e bele hatene haree saida mak esensiál no saida mak lae. Ba ne’e presiza iha moris espirituál kle’an, n
o, husi ne’e mak suli laran-manas apostólika ho kriatividade.
Atu tranzmite karizma ho fidelidade kriativa, ita presiza nafatin refere ba ita-nia hun ka abut hodi moris. Tan ne’e presiza simu, asimila no fó sasin ba karizma Fundadór sira-nian. Karizma entrega mai ita (“A te l’affido”) atu ita hariku ba beibeik liuhusi moris pesoál no komunitária, hodi hatán ba ezijénsia sira Evanjellu no kultura nian, iha Kreda laran.
Ohin loron ita labele serbisu mesak. Ita presiza moris sinodalidade. Nu’udar Família Saleziana, ita mak movimentu boot ida iha Kreda ne’ebé iha korresponsabilidade bele hatán ba foin-sa’e sira nia hakilar no ba misaun Maromak entrega mai ita “ohin”, iha fidelidade ba Don Bosco no Madre Mazzarello nia karizma.
(JG)
