Maun no biin-alin sira, buongiorno!
Ai-knanoik ne’ebé Evanjellu Liturjia ohin nian aprezenta (kf Lc 16,1-13), difisili uitoan atu komprende. Jezús haktuir istória ida korrupsaun nian: adoministradór dezonestu ida, ne’ebé na’ok no hafoin, bainhira patraun deskobre, nia atua ho matenek atu sai husi situasaun ne’e. Ita husu: sá loos matenek ne’e – nia korruptu ida buat ne’ebé nia uza – no saida mak Jezús hakarak dehan mai ita?
Husi istória ita haree katak administradór korruptu ne’e hetan susar tanba nia aproveita ninia patraun nia rikusoin sira; oras ne’e nia tenke fó konta no sei lakon nia serbisu. Maibé nia la rende, la rezigna ba nina destinu no la sai vítima; maibé, nia atua kedas ho matenek, buka solusaun ida, nia nia kriativu. Jezús aproveita istória ne’e atu lansa provokasaun dahuluk ida: «oan sira mundu ne’e nian – nia dehan – hasoru sira nia maluk sira matenek liu fali oan sira naroman nian» (v. 8). Akontese katak, ema ne’ebé iha nakukun, la’o tuir kritériu ruma mundu nian, hatene oinsá tahan maski iha difikuldade laran, hatene sai espertu liu sira seluk; Jezús nia dixípulu sira fali, ita, dalaruma dukur, ka injenuu, la hatene foti inisiativa atu buka solusaun iha difikuldade sira nia laran (kf Evangelii gaudium, 24). Porezemplu, ha’u hanoin ba krize pesoál sira, sosiál, maibé mós ekleziál: dalaruma ita husik dézanimu manán ita, ka monu iha lamentasaun no vitimizasaun. Maibé – Jezús dehan – ita bele mós sai espertu tuir Evanjellu, matan moris no neon na’in atu dixerne realidade, sai kriativu atu buka solusaun di’ak, mai ita no ba ema seluk.
Maibé iha tan hanorin seluk ne’ebé Jezús oferese mai ita, Defaktu, sá loos administradór nia matenek ne’e? Nia deside atu halo deskontu ba ema sira ne’ebé iha tusan, no nune’e nia halo belun sira, hodi hein katak bele tulun nia bainhira patraun duni sai nia. Foufoun nia akumula rikusoin ba an rasik, oras-ne’e nia uza atu halo belun ne’ebé bele tulun nia iha futuru. Iha dalan hanesan, na’ok. Nune’e Jezús oferese hanorin ida kona-ba utilizasaun rikusoin nian: «Imi halo belun ho rikusoin dezonestu, tanba, bainhira nia kuran, sira sei simu imi iha horik-fatin rohan-laek» (v. 9). Atu hetan moris rohan-laek nu’udar liman-rohan, katak, la serve rikusoin sira mundu nian, maibé buat ne’ebé importante mak karidade ne’ebé ita uza iha ita-nia relasaun fraterna sira. Tan ne’e Jezús nia konvite: keta uza soin sira mundu nian ba an rasik de’it no ba imi-nia egoízmu, maibé uza nia atu hamosu amizade sira, atu kria relasaun di’ak, atu atua iha karidade, atu promove fraternidade no ezerse kuidadu ba ema fraku sira.
Maun no biin-alin sira, iha mundu ohin nian mós iha istória korrupsaun nian hanesan ida Evanjellu nian; komportamentu dezonestu sira, polítika foer sira, egoízmu ne’ebé domina ema ida-idak nia hilin no instituisaun nian, no situasaun nakukun barak seluk. Maibé mai ita ema sarani, labele dezanima ka, aat liufali, husik buat sira la’o bá oin, sia indiferente. Oinseluk fali, ita simu bolun atu sai kriativu atu halo di’ak, ho prudénsia no matenek Evanjellu nian, hodi uza soin sira mundu ne’e nian – la’ós de’it materiál, maibé don sira hotu ne’ebé ita simu husi Na’i – la’ós atu hariku an rasik, maibé atu haburas domin fraternu no amizade sosiál. Ne’e importante liu: ho ita-nia atitude hamoris amizade sosiál.
Ita harohan ba Maria Santíssima, atu tulun ita sai hanesna nia kiak iha espíritu no riku iha karidade ba malu.
