Domingas da SIlva FMA
Sesta, 10 Juñu 2023
Iha loraik kmanek ida ne’e sarani Cassa haksolok bo’ot simu Sua Eminensia Don Virgilio Cardeal iha Kapela Cassa. Vizita ida ne’e ho objetivu rua: Nu’udar Bibi-Atan kreda Timor nian hakarak mai vizita hodi fo Ninia bensa ba sarani sira iha fatin refere no Sarani sira halo dialogu abertu ida ho Sua Eminensia. Iha dialogu ida ne’e koalia kona ba asuntu haat (4): 1. Aprezenta lalaok no kresimentu moris fiar nian iha Cassa 2) Aprezenta dadus estatistika sarani iha Cassa, sector edukasaun no dezenvolvimentu iha Cassa. 3) Oinsa relijiaun Katolika tama iha Cassa. 4) Intervensaun no klarifikasaun direta husi Sua Eminensia. Sua Eminensia dehan: Hau haksolok no agradese ba imi nia ospitalidade hodi simu hau iha fatin ida ne’e maibe liu-liu imi nia kolabarasaun ho kreda lokal hodi simu Irman FMA sira iha fatin ida ne’e. Atu hatah ba imi nia preokupasaun ne’ebé ita bo’ot sira aprezenta hau husu imi atu tau atensaun ba sector edukasaun nian no mos kolabora ho Irman FMA sira nia prezensa ne’ebé iha ona imi nia leet; Tanba liu husi aktividade sira ne’ebé irman sira oferese hanesan Oratorio bele tulun labarik no foinsa’e sira aprende hakerek, pinta, suku, toka, kanta, dansa no reza. Buat hotu laos lalais kedas maibe tenki gradual tanba husi imi sira nia aprenzentasaun ita iha esperansa bo’ot katak labarik no foinsa’e sira ne’e mak fini ba kreda no ba nasaun Timor. Molok remata dialogu Sarani sira iha fatin refere hamutuk ho sira nia autoridade sira hakarak deklara ofisialmente ba igreja liu prezensa Sua Eminensia kona propriedade (rai) ne’ebé oferese ona ba kreda.
Tuir tradisaun Salesiana atu remata eventu ida, iha kalan tenki iha boa noite tanba ne’e molok Amo Cardeal fila-fali ba Ainaro nia husik hela mensajen badak ba oratorianu sira iha Cassa. Oratorianu doben sira “oratorio mak fatin hasoru malu nian iha ne’ebé bele hametin liutan relasaun sira; oratorio mak kampu ida iha ne’ebé bele halimar no haksolok hamutuk ho belun sira; oratorio mak fatin atu aprende buat barak; oratorio mak fatin atu reza. Hau husu imi aprende husi labarik Magone: se o hakarak sai ema diak, o tenki obedese ba regra ne’ebé iha ona “Don Bosco” entre imi barak mos hanesan Magone, koko hotu visiu sira ne’ebé ladiak maibe hau enkoraja imi atu husi Magone sai fali Mahone katak sai fali ai-hun ida diak atu bele fo mahon ba kolega sira seluk”.
Obrigada barak ba Sua Eminensia nia vizita no bensa mai ami sarani sira iha Cassa.
