Iha loron 01 fulan maiu 2025, irman Leslie Sándigo to’o iha Jakarta Indonesia, ne’ebè simu ho laran ksolok husi irman sira iha komunidade Regina Pacis Jakarta nian, hamutuk ho Komunidade Edukativa parte ne’eba nian. Hafoin Iha loron 2 Maiu, Irman Leslie Sándigo hasoru malu ho Família Saleziana Indonézia nian iha Wisma SDB, iha ne’ebé partisipa husi Padre, Irmaun no Frater Salesiano sira husi komunidade Wisma no Tiga Raksa, Irmán FMA husi komunidade Regina Pacis no Santa Maria Mazzarello, ADMA husi Jakarta no reprezentante husi Salesiana Kooperadora Jakarta no Tiga Raksa nian. Iha enkontru ida ne’e Irman Leslie Sándigo hato’o ho entuziazmu no ksolok boot estrutura Família Saleziana ne’ebé Saun João Bosco harii ho Santa Maria Mazzarello nu’udar rikusoin no kontribuisaun grupu ida-idak nian iha misaun Saleziana ne’ebé hamutuk eduka no evanjeliza labarik no foin-sa’e sira, hodi serbisu ba sira-nia salvasaun.Ir Leslie Sándigo mós agradese tanba hasoru família Saleziana ne’ebé haka’as-an nafatin atu aumenta kór ba moris iha Kreda nia leet iha Indonézia nasaun ne’ebe minoransa ho relijiaun Katoliku.
Iha loron 03 fulan maiu 2025, Irman Leslie Sándigo to’o iha Inspetoria TIN, ne’ebe ho laran manas simu iha Uma Inspetoria nian Comoro Dili, simu hodi fo hatais nia ho hatais tradisional Timor nian no dansa tradisional husi Irman Juniores sira nu’udar sinal akoliensa nian ba ema foun ruma ne’ebe foin halo nia vizita. Iha loron ne’ebe hanesan kontinua kedas ho inkontro ho Juniores sira no depois de ida ne’e, hala’o inkontru ho membru konsiliu Inspetorial nian. Juniores balun espresa katak buat ne’ebe fahe ho sira tulun sira irman foinsa’e atu moris identidade Salesiana hodi serbi ho ksolok no haraik-an, presiza harii relasaun diak ho ema hotu liu-liu grupu sira Familia Salesiana nian, nakloke no adapta ba situasaun no realidade sira ohin loron nian; tamba Carisma Salesiana mak don presiozu husi Maromak ba Don Bosco ne’ebé sai buras iha mundu no kreda.
Loron 04 fulan maiu 2025, Irman Leslie Sándigo hasoru malu ho membru familia Salesiana Timor nian iha Sentru Joao Paolo II Comoro- Dili, iha inkontro ida ne’e hahu ho selebrasaun Eukaristika, marka mos prezensa husi Padre Provinsial Timor nian, Padre Anacleto Pires SDB. Iha inkontru ne’e Irman Leslie Sándigo apresenta kona ba identidade ambitu Familia Salesiana nian no grupu oioin ne’ebe hamahan iha Familia Salesiana. Iha loron kraik irman kontinua ninia inkontru ho Antigas no antigos alunos FMA nian, iha eskola Maria Auxiliadora Comoro-Dili. Loron tuir fali, katak loron 05 fulan maiu, hala’o nia vizita ba foho, iha komunidade Maria Romero Cailako, iha nia vizita ne’e hasoru malu ho Komunidade Edukativa sira no alunos sira husi eskola Primaria Saun Domingos Savio Cailako.
Iha loron 05 fulan maiu 2025, Irman Leslie Sándigo kontinua fali ninia visita ba sentru produsaun sira Inspetoria nian iha Dili, hodi hasoru direitamente foinsa’e hirak ne’ebe serbisu iha sentru produsaun sira ne’e no hare realidade iha sira nia fatin serbisu nian, ho tempu hanesan irman ba halo mos ninia visita ba labarik estudante sira iha Eskola Maria Auxiliadora, husi Jardin infantil, elementaria, pre-secundaria no ho professor sira. Iha lorokraik nia hala’o inkontru ho kandidate sira, Postulante no novisa sira. Iha ninia inkontru ho kandidata sira asunto hanesan ne’e mak apresenta grupu sira ne’ebe involve iha Familia Salesiana, no ikus maka taka ho reza tersu hamutuk iha estatua Saun Joao Paolo II nian iha Tasi tolu, ho okasiaun ida ne’e Irman Leslie Sándigo mos aproveita hodi visita fatin ne’ebe Papa Francesco hodi selebrasaun Eukaristika iha tinan kotuk.
Iha loron 07 fulan maiu 2025, irman Leslie Sándigo hala’o visita ba Komunidade Salesiano sira nian, iha Comoro Dili hodi hasoru malu ho Padre Salesiano sira, hafoin ba visita mos komunidade Saun Joao Bosco Balide no Museu da Resistencia Timor Leste nian, iha ninia visita iha Museu da Resistencia ema sira ho laran haksolok simu irman hodi tara tais nu’udar sinal bemvinda nian ba irman Leslie Sándigo. Iha kalan hala’o visita ba komunidade Divina Providenza, hodi buona noite ba menina no irman sira, nia konvida Foinsae sira atu iha relasaun besik liutan ho Maria hodi bolu Nai Feto iha Fulan Ida nee nudar inan, belun no bin. Ho tempu hanesan nia sublinha mos kona ba Madre Maria Troncatti ninia karakteristika tolu, nu’udar Inan, missionaria no artezana paz nian.
Iha loron 08 fulan maiu, madre hala’o ninia ba parte leste, katak iha komunidade Sta. Teresa D’Avila Baucau, Komunidade Beata Laura Vicunha Laga no komunidade rua iha Venilale, mak komunidade Maria Auxiliadora no komunidade Maria Mazzarello. Iha ninia vizita iha Laga nia hala’o inkontru ho ADMA, irman perpetua zona ne’eba nian (Laga, Baucau no Fuiluro), hafoin iha Venilale nia hasoru malu ho pre-aspirante, aspirante, labarik orfanatu sira, menina interna no estudante sira iha eskola Tecnica Vokasional. Iha ninia sorumuto ne’e
Mensajen ne’ebe nia hato’o ba labarik no menina sira mak, hato’o hela liafuan badak ho istoria ida kona ba labarik ida ne’ebé lori nia aifunan ba tau iha nain feto nia oin ho kor sira ne’ebé balun ladun furak, balun kor laiha, balun furak no morin liu. Tan ne’e bainhira ita reza ave Maria ita tenke reza ho fuan, tanba Ave Maria ida-idak ne’ebé ita reza ba nain feto, dala ruma mos hanesan ne’e, balun reza la diak hanesan aifunan ne’ebé laiha kor, balun reza hanesan aifunan ne’ebé la dun furak, balun reza diak hanesan aifunan ne’ebé fo kor furak no morin. Nune’e Ave Maria ida-idak ne’ebé ita reza hanesan rosas ne’ebé ita tau iha Nain feto nia oin. Bainhira ita halo diak ba ita nia maluk sira hanesan aifunan ne’ebé furak no morin liutan. Durante ninia vizita iha Venilale nia selebra mos festa Madre Mazzarello nian hamutuk ho komunidade rua iha fatin refere. Iha loron tuir mai, loron 09 fulan maiu, irman Leslie Sándigo partisipa iha selebrasaun hodi fo medaglia ba ADMA foun sira ne’ebe hakarak fo sira nia an atu tuir moris no imita tuir Maria Inan tulun nain nia vertude. Selebrasaun ida ne’e hala’o iha Fatumaca Santuario Maria Auxiliadora nian ne’ebe pertense ba komunidade Padre Salesiano sira nian. hafoin kalan hala’o fali nia viajen fila mai Dili, no festeja hamutuk festa Maria Mazzarello nian ho Familia Salesiana sira iha Zona Dili nian.
Iha loron ikus ninia visita nian, loron 10 fulan maiu 2025, iha dader hala’o inkontru ho diretora sira no iha lokraik iha inkontru ho irman perpetua sira zona Dili no kalan iha misa agradesementu nian ba ninia visita iha inspetoria TIN (Timor Indonesia). Konteudu ne’ebe fahe ho irman perpetua sira mak kona ba Identidade Familia Salesiana nian ne’ebè hakerek iha Konstituisaun FMA nian. Hafoin iha kalan agradesementu ikus nian, ne’ebè partisipa husi Komunidade hotu ne’ebe iha zona Dili nian, agradese irman Leslie Sándigo liu husi, drama, dansa kultura, dialogu no seluk tan tuir kreatividade komunidade ida-idak nian. Molok atu remata irman Leslie Sándigo mos hato’o ninia mensajen liu husi apresentasaun ne’ebe nia rasik mak prepara, tuir mai ninia apresentasaun; “Peregrinu esperansa nian”, Nu’udar peregrinu ida, ita presiza mos buat balun ne’e ita lori ho ita nia an, durante ita nia la’o dalan peregrinasaun nian ida ne’e. Ita presiza pasta ida, pasta peregrino nian, ne’ebe sai fatin ida disponivel atu rai sasan esensial ba ita nia viagem. Sinelus, Iha pasta nia laran, ita sei hetan sinelus, simboliza ita nia laran entusiasmo no disponibilidade atu kontinua viajen ida ne’e to0o iha nia destinasaun. Aitonka, atu ita nia viajen sai seguru liu iha ita nia hakat sira, ita presiza aitonka ida, sadere ita nia an, ita nia kbiit ba deit iha Maromak. Be’e, durante Viagem, la haluha atu lori bee. Bee fo forsa no fo moris. Hanoin ba ita nia batismu, bee simbolu purifikasaun nian , simbolu kasu sala nian. Paun no tua mos ita presiza iha ita nia vigem, alem de hahan ba fiziku, ita nia aihan espiritual, Kristu nia futar isin no ran ne’ebe ita simu Eukaristia, sai ita nia kbiit ne’ebe sustenta ita. Biblia, Maromak nia liafuan, ne’ebe ita rona, sai ita nia matadalan iha ita nia viajen nu’udar peregrinu ida. Ho roman Maromak nia liafuan nian, ita sei hetan Kbiit atu tahan ita nia hakat sira, sei sai kmaan liu tan. Rosario, Keta haluha Figura ida ne’ebe importante tebes mos mai ita, ita nia inan Maria. Maria labele falta iha ita nia peregrinasaun sira moris nian, tan nia mak inan ne’ebe fiel no nunka husik ita mesak”. Hafoin de apresentasaun ida ne’e, Irman Leslie Sándigo husik hela rekordasaun kiik ruma ba menina, joven sira ne’ebe serbisu iha fatin refere no irman sira hotu. Agradese tebes ba irman Leslie Sándigo nia visita ne’ebe lori mai ami profumo Salesianidade nian, lembransa moris ida ne’ebe nakonu ho valór karizmátiku misaun Salesiana nian.
