Dili – Iha loron 18 Maiu 2022, Inspetora FMA TIN, Ir Alma Castagna remata nia vizita kanónika iha komunidade Eusebia Palomino. Bainhira superiora ida vizita uma ida, sempre iha akollida husi komunidade edukativa molok prosede ba ajenda sira seluk hanesan enkontru sira pesoál no komunitáriu, enkontru ho profesór/a sira, enkontru ho empregadu/a la’ós profesór/a, vizita iha oratóriu, nst.
Iha klima ida espíritu família nian, Irmán sira no membru sira komunidade edukativa simu Ir Alma iha loron sábadu 16 Maiu ho dansa “150 aniversário” husi turma hotu no siklu hotu. Hafoin tuir kedas ho premiasaun ba manán-na’in sira kuiz Mazzarello nian kompostu husi OPIAM, grupu Laura no grupu Jornál Parede niann.
Hafoin iha enkontru ho Irmán FMA sira hodi introdús vizita kanónika, Ir Alma subliña verbu sira hanesan “horik (prezente), haree, harohan no halo”. Hotu tiha enkontru ho Irmán sira, tuir kedas ho enkontru ho manorin sira. Ir Alma partilla ho sira kona-ba Ata Kapítulu Jerál no ninia objetivu no deliberasaun no kona-ba moris tuir Sistema Preventivu.
Iha biban vizita nian ida-ne’e, Ir Alma bele mós hasoru ho empregadu/a sira seluk ne’ebé la’ós manorin. Ir Alma fó oportunidade atu sira bele mós fahe ka halo pergunta, aleinde agradese ba sira-nia kontribuisaun ba misaun uma Eusebia Palomino no eskola nian. Atividade seluk mak vizita oratóriu Namuncurá no Maria Auxiliadora iha loron 17 Maiu. Tuir Ir Alma, ne’e mak periferia iha kapitál Dili, ne’ebé la dook husi komunidade. Soru-mutu seluk mak ho grupu Voluntáriu Palomino, ne’ebé moris iha Abríl 2021, no sei eziste. Iha enkontru ne’e foin-sa’e Palomino sira husu atu Irmán sira akompaña sira no fó formasaun ne’ebé halo sira atentu/a liután ba realidade sira moris bá.
Komunidade FMA agradese ba Inspetora nia vizita iha loron 18 Maiu, ho Santa Missa iha besik kalan tuku 18.30, selebra husi P. Nelson Gonçalves. Depoizde jantár, iha momentu agradesimentu hodi aprezenta Madre Mazzarello nia moris, nu’udar empeñu atu hamanas fali identidade karizmátika no kompromisu atu sai komunidade vokasionál hanesan iha Mornese.
Inspetora Alma Castagna enkoraja komunidade atu moris tuir Estréia 2022 no Kapítulu Jerál nia hilin sira, atu iha misaun edukativa, haka’as an atu prezente nafatin nu’udar edukadora iha labarik, foin-sa’e no manorin sira nia leet, atu kontinua hakle’an aspetu sira ekolojia integrál nian hodi forma mentalidade kuidadu ambiente nian, maski hatene katak presiza konstánsia no tempu naruk.
(JG)
