Alice Filipe
Venilale 25 – 29 Maiu 2023
Vizita kanónika mak atu promove komuñaun iha espiritu familia nian, fidelidade ba konstituisaun sira no vitalidade obra sira-nian, husi Inspetora ba irmán sira iha komunidade. Tan ne’e iha loron hirak ne’e Ir. Alma Castagna FMA, Inspetora Timor – Indonézia, halo vizita kanónika iha komunidade Madre Mazzarello Venilale. Irmán sira, Komunidade Edukativa no Estudante sira simu madre Alma ho entuziasmu liu husi dansa kultura no tebedai.
Aleinde hasoru Irmán sira, hasoru mos grupu sira ne’ebé irman sira komunidade nian responsavel; ADMA, Edukador/a sira ETV nian, Oratorianu/a ho animador/a husi oratoriu sentru no reprezentante oratorianu/a husi 
oratoriu Osso- Hula no Venedoku nian. Lia menon husi madre ba Oratorianu/a sira katak maske imi uitoan maibé imi kontinua sai hanesan fermentu ne’ebé bele dada maluk barak mai oratoriu ho imi-nia hahalok diak liu husi katekeze no atividade sira ne’ebé imi halo hamutuk ho irmán sira no animador/a sira. Ba estudante ETV sira madre rekomenda atu dezenvolve kapasidade no matenek ne’ebé sira iha ba seluk nia diak no ba nasaun nia dezenvolvimentu.
Nu’udar ami-nia agradesimentu ba Madre Alma nia prezensa iha ami leet durante loron hirak ne’e liu husi liafuan murak sira, ne’ebé sai nu’udar fermentu ne’ebé sei transforma ami iha ami idaidak nia moris no misaun. Ami agradese Madre, liu husi Eukaristia santa ne’ebé prezide husi Pe. Abrão Pinto Soares SDB iha kapela komunidade nian. Hafoin agradese mos liu husi knananuk no dansa agradesimentu nian husi komunidade no mos husi reprezentante Antigu/a aluno/a sira.
