Komunidade São João Bosco-Balide, hahu loron 24/3/2025 to’o loron 28/3/2025, Ir. Evangelina Xavier FMA, nu’udar inspetora Timor- Indonesia hala’o nia vizita kanonika ba loron 5, hodi haburas misaun nia vitalidade, ho espiritu no karisma fundador sira nian. hanesan husun ne’ebe hakerek iha konstituisaun artigu 147 ne’ebe sublinha katak provinsial ninia visita mak atu promove komunhaun iha espiritu familia, fidelidade ba konstituisaun sira, nune’e liuhusi ninia prezensa ida ne’e mak hametin liutan klima fraternidade nian, iha-ne’ebé hamutuk bele buras hamutuk iha sinodalidade iha fiar no iha esperansa.
Iha loron dahuluk vizita nian, hahu akolliensa fraterna no domin husi Irman sira iha komunidade, menina larista, estudante Centro Formasaun Secretariado no Computer hamutuk ho reprezentante komunidade edukativa balun.
Iha dia 24 lorokraik, aspirante nain 5 ofisialmente hakat tan pasu ida ba oin iha etapa postulantadu nian, hodi simu medalha postulante nian. Pasajen ne’ebe sira hili atu sai nu’udar matadalan ba sira nia etapa ida ne’e mak Hau mak uvas hun lolos (Jo, 15,1). Ir. Evangelina konvida postulante foun sira atu tau abut iha Kristu, ne’ebe mak sai uvas hun lolos no entrega-an ba Nia ne’ebe nu’udar jardineiru los. tau matan ba sira nia la’o dalan, nune’e bele fo fuan wain. Ir. Evangelina mos halo enkontru ho ADMA sira ne’ebe prezente no hola parte ba komunidade ida ne’e.
Postulante sira sei fahe sira idaidak nia ksolok ba grasa vokasaun nian ne’ebe sira simu husi Na’i hodi bele hakat tan pasu ida ba oin iha etapa postulantadu, tuir mai postulante ida-idak nia liafuan ba momentu ksolok nian ne’ebe sira hasoru:
- Postulante Joana Soares: “Uluknanain ha’u agradese ba Maromak ba grasa vokasaun ne’ebe haraik mai ha’u, ha’u haksolok tebes ho dalan ne’ebe ha’u hili, fo oportunidade ne’ebe madre sira fo mai ha’u atu hakat tan pasu ida ba oin hodi esperimenta Jesus nia bolun. Haksolok tan Na’i nia domin mai ha’u ne’ebe hili no fihir ha’u atu sai Ninia istrumentu iha dalan Salesiana”.
- Postulante Sara Salsinha: “Ha’u sente haksolok tebes tanba hakat tan pasu ida ba oin nu’udar postulante, ha’u agradese Na’i ba grasa vokasaun nian ne’ebe haraik mai ha’u, Na’i hili ha’u atu sai nia isntrumentu domin nian ba ema seluk, tuir Nia ho ksolok no esperansa”.
- Postulante Francelina: “Ha’u nia fuan nakonu ho ksolok no gratidaun, tanba hakat tan ona pasu ida ba oin nu’udar postulante. Jesus mak ha’u nia uvas hun loloos, hamutuk ho Nia ha’u sei la duvida. Obrigada wain ba suporta hotu”.
- Postulante Crecencia: “Agradese ba Maromak tanba ho nia domin no tulun hotu mak ha’u bele hakat tan ba oin nu’udar postulante, hau sente haksolok tebes tanba Instituto FMA simu ha’u atu sai Maria Auxiliadora, Don Bosco no Madre Mazzarello nia oan, ne’ebe prontu atu serbi Maromak”
- Postulante Jacinta: “Ha’u sente haksolok tebes, ba grasa ne’ebe ha’u hetan atu hakat tan ba oin hodi tuir no esperimenta Kristu bibi atan diak nia domin liu husi dalan Salesiana. Obrigada wain”
Durante Ir. Evangelina nia vizita, aleinde hasoru Irman sira, hasoru mos grupo oioin ne’ebe pertense ba misaun komunidade ida ne’e: menina larista sira, iha buona noite, estudante CFSC sira iha Buon giorno dader nian, postulante sira no mos Pe. Angelo Salsinha, nu’udar amu Pároku, Parokia Balide nian. Iha ninia konferensia no inkontru ho irman sira, fo koragem no desafia Komunidade atu kontinua la’o hamutuk iha sinodalidade sai peregrinu sira esperansa nian ba maluk sira no mos ba kreda, iha misaun partillada komunidade ida ne’e nian. Vizita kanonika konklui iha loron 28 fulan marsu ho Selebrasaun Eukaristia gratidaun nian no agradese ba Madre Evangelina nia domin no tulun hotu ne’ebe simu.
Sr. Adelaide Almeida, FMA & Postulante
