Dili – Reitór-Mor Pe. Ángel Fernández Artime, nu’udar Aman, sentru unidade no garante fidelidade ba karizma to’o ona iha Dili, Timor-Leste. Família Saleziana iha Timor-Leste, SDB, FMA, Salezianu Kooperadór, ADMA, Antigu/a alunu/a sira, VDB no liuliu labarik no foin-sa’e sira, haksolok atu simu nia. Simu tiha iha aeroportu, hafoin foin-sa’e sira ho banda eskoltu nia to’o iha Comoro, para iha EBC Maria Auxiliadora atu labarik no pré-adolexente sira fó sira-nia benvindu, hafoin iha gymn SDB Comoro hetan akollida ofisiál ho Pe.Apolinário Neto nia liafuan boas-vindas nian no mós Reitór-Mor rasik nia liafuan badak.

Tema ba enkontru ne’e mak “Hametin liután ita-nia kompromisu ba misaun”. Iha ninia liafuan benvindu nian, Pe Apolináriu aprezenta uitoan istória kona-ba oinsá SDB sira to’o iha Timor ho “misionáriu salezianu aten-barani sira”. Nia esplika katak misaun hahú ho espediasaun rua; ida uluk husi 1927-1929. Daruak husi 1946. Espedisaun daruk mak la’o ho di’ak no fini ne’ebé karik kontinua buras to’o ohin loron housi Dili ba parte oioin Timor nian, liuliu iiha parte loro-sa’e. Fuan oioin husi ai-hun ne’e nian mak “SDB, FMA, Salezianu Kooperadór/a sira, ADMA, Antigu/a alunu/a sira, VDB”. Grupu sira ne’e servisu iha parókia, iha sentru formasaun, iha eskola, iha oratóri no fatin oioin. Igreja lokál no Estadu koninua apoia misaun saleziana. Aleinde Timor, prezensa saleziana tama iha Indonesia iha 1985.

Depoizde padre provinsiál nia liafuan, Reitór-Mor mós hato’o nia liafuan badak. Nia hateten katak nia “haksolok tebes atu hamutuk ho imi hotu. Loos duni, katak Roma dook liu husi Timor. Roma mak dook, laós Timor husi Roma. Ne’e loron datoluk viajen nian. Ami sai domingu no viajen loron tomak nune’e mós segunda, tersa. Ami halo vizita dahuluk iha Indonesia no ami sei fila ba dala rua. Ami haksolok ho imi hotu, ho joven sira, ho Família Saleziana. Ami sente impresaun boot haree ema barak, família barak, adultu barak, ema barak. Seguramente aban iha Don Bosco nia festa sei hasoru ema barak liután, Ha’u hakarak dehan buat ida ba imi ne’ebé loos nian. Ammi la mai iha ne’e tanba iha ami-nia programa ami tau ami tenke bá Timor ohin, Lae. Ami hakarak hela loron ne’e ihaTimor. Ida-ne’e lia-loos. Iha festa Don Bosco nian, tinan dahuluk iha Valdocco. Tina daruak iha Áfrika, Serra Leão. Ema nia terus boot ho moras ébola. Tinan datoluk iha Antilhas, tanba selebra prezensa saleziana tinan 100 iha Cuba. Tina dahaat ami dehan, ita tenke bá Ázia, no Ázia boot liu. Loos ga lae? No Timor la’ós boot liu, loos? No ami dehan fatin hotu furak atu bá vizita. Maibé ami dehan Timor espesiál liu ati bá selebra. Nune’e ha’u haksolok atu kumprimenta imi hotu, ha’u-nia maun-alin salezianu sira, ha’u-nia irmaun salezianu agora bispu, prezente iha-ne’e mós. Bispu Igreja nian maibé ha’u-nia irmaun salezianu. Loos ka lae Virgílio? Loos. Ha’u-nia Irmán doben sira, ho relijiozu sira seluk, no familia sira, Família Saleziana, ita-nia Família Saleziana tomak ne’ebé furak”.