Leitura sira Domingu da-27 aprezenta nu’udar tema prinsipál, Maromak nia projetu ideál ba mane no feto: forma komunidade ida domin nian, estável no indissolúvel, hodi tulun malu atu sai haksolok. Domin ne’ebé halo iha saran-an no entrega, sai ba mundu reflesu Maromak nia domin nian.
Leitura dahuluk dehan katak Maromak hakiak mane no feto atu kompleta malu, atu tulun malu, atu hadomi malu. Ida de’it iha domin, mane no feto sai “isin ida de’it”. Sai “isin ida de’it” implika moris iha komuñaun totál ba malu, fahe malu moris, metin iha domin.
Iha Evanjellu, Jezús, hodi konfronta Lei judaika divórsiu nian, afirma filafali projetu ideál Maromak nian ba mane no feto: sira simu bolun atu forma komunidade estável no indissolúvel domin nian, partilla no doasaun nian. Iha Maromak nia projetu nia la prevé separasaun, basá Maromak la konsidera domin ida ne’ebé la’ós totál no la dura iha tempu.
Domin rohan-laek, iha kompromisu indissolúvel de’it, maka respeita projetu dahuluk/primordiál Maromak nian ba mane no feto.
Leitura daruak fó hanoin mai ita kona-ba Maromak nia domin ba ema sira nia “kualidade”… Maromak hadomi ema tebes to’o haruka nia Oan mesak. Jezús sai solidáriu ho ema sira, hodi kumpre Aman Maromak nia projetu, simu atu mate iha krús atu dehan ba ema sira katak moris loos maka domin to’o ba nia konsekuénsia ikus liu. Hodi liga Surat ba Ebreu sira ho tema mahuluk liturjia domingu ne’e nian, ita bele dehan katak kabe-na’in/kazál kristaun tenke testemuña, ho nia doasaun lahó limite no ho ninia entrega totál, Maromak nia domin ba umanidade.
