Ho Kuarta “Cinzas” hahú Kuarezma, períodu ne’ebé mai molok Páskua, no ne’e mak loron jejún no abstinénsia husi naan, abstinénsia ne’ebé Kreda husu sesta hotu tinan nian maibé ita haree katak iha dékada sira ikus nian redús de’it ba sesta Kuarezma nian. Loron seluk jejún no abstinénsia nian mak Sesta Santa.
«Memento homo, quia pulvis es et in pulverem reverteris», ka: «Ema, hanoin bá katak ó rai-rahun no sei fila ba rai-rahun». Liafuan sira-ne’e mosu iha Génesis 3,19 bainhira, Adão ho Eva Maromak duni sai husi Éden depoizde halo sala orijinál, kondena ba serbisu rai nian no ba mate.
: , -.-
«Imi keta halo buat di’ak iha ema sira oin atu sira haree imi. Halo nune’e karik, imi sei la simu imi nia kolen husi imi nia Aman ne’ebé iha Lalehan. Ne’e duni, wainhira ó fó esmola, keta husik ema hu’u karau dikur iha ó-nia oin, hanesan ema laran makerek sira halo iha sinagoga ka iha lurón sira, atu ema hahi sira. Ha’u dehan lia-loos ba imi, sira simu ona sira-nia kolen. Maibé, wainhira ó fó esmola, oó-nia liman karuk la bele hatene saida mak ó-nia liman loos halo, atu ema ida labele hatene ó-nia esmola, no ó-nia Aman ne’ebé haree buat subar, sei fó kolen ba ó.”
“Wainhira imi halo orasaun, keta halo hanesan ema laran-makerek sira, ne’ebé gosta harohan hodi hamriik iha sinagoga sira. Tebes, Ha’u dehan ba imi, sira simu ona sira-nia kolen. Maibé, wainhira ó harohan, tama iha ó-nia kuartu laran, taka odamatan hodi harohan sumik ba ó-nia Aman, basá Nia ne’ebé hare buat sumik, sei fó kolen ba ó.
“Wainhira imi hadera an, keta hatudu oin triste, hanesan ema laran-makerek sira, ne’ebé halo sira oin triste atu ema haree katak sira hadera an. Tebes, Ha’u dehan ba imi katak ema sira ne’e simu tiha ona sira-nia kolen. Maibé, wainhira ó hadera an, tau mina morin ba ó ulun, fase oin, atu ema la bele hatene katak ó hadera an; ó-nia Aman ne’ebé subar hela mak hatene; nune’e ó-nia Aman, ne’ebé haree husi nia subar fatin, sei fó kolen ba o”».
Kuarta “cinzas” loke tempu boot Kuarezma nian. La’ós tempu triste ida maibé tempu penitensiál. Diferensa ida-ne’e importante tanba penitésnia katak purifika an husi buat hotu ne’ebé impede ksolok. Ita-nia fuan dalaruma sai ferrujen ho sasán sira ne’ebé hatodan nia. Sasán sira ne’ebé susar mai ita atu hasai husi ita-nia an. Sasán sira ne’ebé lakohi mate. Nune’e presiza bolu sasán sira-ne’e ho nia naran no hasai husi sira buat ne’ebé habosu sira. Nune’e de’it, hanesan sélula kankru nian ida ne’ebé la iha posibilidade atu simu ai-han nia sai mate, nune’e mós buat ne’ebé impede atu ita sai livre tenke mate iha ita. Tempu tomak Kuarezma nian sei tulun ita atu halakan roman kona-ba aspetu barak ne’ebé ita subar iha ita-nia an rasik. Maibé pontu hahú nian Jezús rasik mak sujere iha pasajen Evanjellu Mateus nian ohin:
«Imi keta halo buat di’ak iha ema sira oin atu sira haree imi. Halo nune’e karik, imi sei la simu imi nia kolen husi imi nia Aman ne’ebé iha Lalehan».
Buat dahuluk ne’ebé ita tenke hamate mak hakaran boot atu hatudu an, atu ema haree, buka ema seluk nia hateken. La’ós buat ruma moralista, maibé buka komprende iha xave ezistensiál. Ita hotu presiza hateken di’ak nian atu it abele moris. Ema ida labele la husik ema hateken ba nia, estima nia ho domin, maibé buat ne’ebé Jezús hanorin mak hateken ne’ebé umaniza moris, ita iha nafatin hoi ta, no ida-ne’e mak Maromak nia hateken. Defaktu Nia hateken nafatin mai ita ho estima no di’ak tomak ne’ebé ita presiza atu moris. Nia mak, defaktu, fó mai ita moris. No Nia mak, defaktu, mantein ita moris nafatin. Se Nia halo ida-ne’e tanba Nia bele haree ita, hakat liu ita-nia mizéria sira, ida-ne’e mak Jezús hanorin mai ita. Nia defaktu, la haree iha it aida-idak ita-nia kulpa ka salan de’it, maibé ema tomak, mane ka feto ida haksumik iha nia an. Kuarezma mak tempu ne’ebé ita tenke husik Maromak nia hateken to’o iha ita, no halakon husi ita buat hotu ne’ebé impede atu hateken ne’e to’o mai ita.
