Liturjia Domingu da-29 fó hanoin mai ita, dala ida tan, katak Maromak nia lójika lahanesan mundu nia lójika. Nia konvida ita atu heba’i ita-nia projetu pesoál sira podér no grandeza nian no halo sai ita-nian vida ida servisu nian ba maun-alin sira. Iha domin no saran-an hodi serví iha haraik-an ba maluk sira maka Maromak oferese ba ema sira moris rohan-laek no loos.
Leitura dahuluk aprezenta mai ita “Maromak nia atan”, ema hakribi no despreza nia, maibé liuhusi nia maka Maromak nia moris no maksoin hatudu sai. Leitura ne’e fó hanoin mai ita katak ba Maromak vida ida moris iha simplisidade, haraik-an, sakrifísiu, entrega no saran-an nian, la’ós moris ida malisan nian, lalakon nian, frakasu nian; maibé vida ida fekunda no realiza ho modu nakonu, lori libertasaun no esperansa ba mundu no ema sira.
Iha Evanjellu, Jezús konvida eskolante sira atu mehi ambisaun nian, grandeza nian, podér nian no domíniu nian la manipula sira, maibé halo sira-nia moris don ida domin no servisu nian. Sira simu bolun atu tuir Mane-Maksoin “ne’ebé mai atu serví no haraik moris”, nune’e eskolante sira tenke fó sasin kona-ba orden foun ida no propoin, ho ezemplu, mundu ida livre husi podér ne’ebé hahata (halo sai atan).
Iha leitura daruak, autór Surat ba Ebreu sira ko’alia mai ita kona-ba Maromak ida ne’ebé hadomi ema lahó limite no, tanba ne’e, dispostu atu asume ema sira nia frajilidade, tuun ba sira-nia nivel, partilla ninia kondisaun. Nia la subar An iha nia podér no omnipoténsia nia kotuk, maibé aseita atu tuun hodi ba hasoru ema sira no oferese ba sira Ninia domin.
