Liturjia Domingu da-31 Tempu Komún nian dehan mai ita katak domin horik iha sentru esperiénsia sarani nian. Dalan fiar nian, ne’ebé loron ba loron, ita hetan konvite atu la’o tuir, bele habadak iha domin ba Maromak no domin ba maun-alin sira – aspetu rua ne’ebé la esklui malu, maibé kompleta malu.
Leitura dahuluk aprezenta mai ita inísiu “Shema’ Israel” nian – proklamasaun solene fiar nian ne’ebé israelita ida-idak tenke halo loroloron. Ne’e mak afirmasaun Maromak nia unisidade no konvite ida atu hadomi Maromak ho fuan tomak, ho klamar tomak no ho kbiit tomak.
Evanjellu haktuir mai ita, ho forma klara no kestiona-laek, katak esperiénsia fiar Jezús nia eskolante nian, habadak iha domin – domin ba Maromak no domin ba maun-alin sira. Ukun-fuan rua ne’e la bele haketak malu: “hadomi Maromak” katak kumpre ninia vontade no estabelese ho maun-alin sira relasaun domin nian, solidariedade nian, partilla nian, servisu nian, to’o don totál vida nian. Buat seluk mak esplikasaun, dezenvolvimentu, aplikasaun iha vida prátika kona-ba koordenada fundamentál rua vida sarani nian.
Leitura daruak aprezenta Jezús Kristu nu’udar amlulik-boot ne’ebé mai iha mundu atu kumpre Aman nia projetu maksoi’k no atu oferese nia moris iha doasaun domin nian ba ema sira. Kristu, ho nia obediénsia ba Aman no ho nia saran-an ba ema sira nia di’ak, hatudu mai ita forma di’ak liu atu esprime ita-nia domin ba Maromak.
