Liturjia Domingu da-33 Tempu Komún nian aprezenta mai ita, konvite ida ba esperansa. Nia konvida ita atu konfia iha Maromak Libertadór, istória nia Na’i, ne’ebé iha projetu definitivu moris nian ba ema sira. Tuir testu sira, Nia sei muda mundu nia nakukun ba loron foun ne’ebé la nahas.
Leitura dahuluk haklaken tempu libertasaun husi Maromak ne’ebé so’i nia Povu fiél, povu ne’ebé hetan persegisaun no sai dezanimadu. Ida-ne’e mak esperansa ne’ebé tenke tane ema justu sira, ne’ebé simu bolun atu sai fiél ba Maromak, apezarde persegisaun no prova. Sira-nia konstánsia no fidelidade sei hetan rekompensa ho moris rohan-laek.
Iha Evanjellu, Jezús garante ita katak, iha futuru ida lahó data, mundu tuan egoízmu no salan nian sei monu no, iha nia fatin, Maromak sei hamosu mundu foun, vida no ksolok rohan-laek nian. Ba nia eskolante sira, Jezús husu atu matan-moris ba sinál sira ne’ebé hatudu realidade foun ne’e no disponivel atu hakohak projetu sira, apelu no dezafiu sira husi Maromak.
Leitura daruak fó hanoin katak Jezús mai mundu atu konkretiza Maromak nia projetu, liberta ema husi salan no hatama nia iha dinámika ida moris rohan-laek nian. Nia hanorin ita manán egoízmu no salan no halo moris sai don ida domin nian ba Maromak no maun-alin sira. Ida-ne’e mak dalan mundu foun no vida definitiva nain.
