Iha surat ida haruka ba ninia maun-alin salezianu sira no ba Família Saleziana, P. Ángel Fernández Artime, Reitór-Mor Salezianu sira-nian, anunisa realizasaun Kapítulu Jerál 29 tinan ida antes ida-ne’ebé estipula ona, basá Papa Francisco konvoka, iha domingu 9 Jullu Konsistóriu foun ida atu kria Kardeál foun 21, entre sira-ne’e Reitór-Mór, no iha tinan ida nia laran nia tenke husik ninia knaar animasaun no governu Kongregasaun nian.
Reitór-Mor P. Ángel foti desizaun ida-ne’e, depoizde audiénsia privada iha 11 Jullu 2023 iha Vaticano, tuir Amu-Papa nia pedidu.
“Papa haree ho matan di’ak, ba Kongregasaun nia di’ak, katak depoizde Konsistóriu loron 30 Setembru nian ha’u bele kontinua nu’udar Reitór-Mor to’o loron 31 Jullu 2024, katak, to’o sesaun plenária Konsellu Jerál nian tempu bailoron europeu”, P. Ángel fó sai.
“Depoizde data ida-ne’e ha’u sei aprezenta ha’u-nia renúnsia nu’udar Reotór-Mor tanba ha’u simu bolun husi Santu Padre ba servisu ne’ebé nia sei konfia mai ha’u. Nune’e mak nia komunika mai ha’u”. No nia klarifika: “Vigáriu, don Stefano Martoglio, sei asume Kongregasaun nia governu to’o selebrasaun Kapítulu Jerál 29”, ne’ebé Reitór-Mor anunsia ne’ebé sei hala’o iha Fevereiru 2025.
Iha finál mensajen nian, Reitór-Mor remata hodi husu “atu ita kontinua intensifika ita-nia orasaun” ba Papa Francisco no ba “buat ne’ebé ita sei moris iha tinan ne’e nu’udar Kongregasaun no nu’udar Família Saleziana”. Espesialmente, Reitór-Mor esplika: “ha’u mós husu ba imi atu harohan mai ha’u ba serbisu foun iha Kreda ne’ebé, nu’udar Don Bosco nia oan, ha’u aseita iha obediénsia, maski ha’u la buka no la dezeja”.
(fonte donboscosur.org)
