Salezianu Na’in Tolu Simu Ordenasaun Prezbiterál
Fatumaka, 15 Agostu 2023
Arsebispu Dili, D. Virgílio Cardeal do Carmo da Silva, sdb prezide Misa Solenidade Assunção Na’i-Feto nian no Ordenasaun Prezbiterál ba diákonu na’in tolu: Filipe Cardoso Sarmento, sdb; Filomeno Martins Belo, sdb no Juvito Freitas Gama, sdb iha Santuário Maria Auxiliadora Fatumaca akompaña husi D. Leandro Maria Alves, Bispu Baucau, Provinsiál Salezianu Don Bosco TLS, Pe Anacleto Pires, sdb no na’i-lulik 50 resin ho prezensa amu na’in rua husi Austrália. Hafoin serimónia entrega diákonu sira husi família ba Provinsiál, no simu tiha amu-bispu Baucau, D. Leandro Maria Alves, no iha Bispu Baucau nia oin, amu Provinsiál Salezianu garante prontidaun, obediénsia no kolaborasaun husi Salezianu sira no mós Família Saleziana nian iha Dioseze Baucau. Hafoin, D. Virgílio Cardeal prezide Santa Misa no konfere Orden Prezbíteru sira-nian ba diákonu na’in tolu iha sarani rihun resin nia oin ne’ebé partisipa iha selebrasaun ida-ne’e hahú husi família amu foun na’in tolu nian, estudante sira no foin-sa’e sira husi Laga no Venilale, irmán sira husi kongregasaun oioin, frater sira, irmaun prénovisu no irmaun novisu sira. Dom Virgílio Cardeal konvida sarani sira hotu, liuliu diákonu na’in tolu (ne’ebé lá kleur tan sai na’i-lulik)atu buka la’o tuir Na’i-Feto nia ain-fatin hodi la’o ba Maromak no sai Maromak ninian de’it. Husu orasaun ba amlulik foun na’in tolu, Pe Filipe Cardoso Sarmento, sdb, Pe Filomeno Martins Belo, sdb no Pe Juvito Freitas Gama, sdb. Parabéns ba amu foun na’in tolu no mós ba amu sira seluk ne’ebé selebra sira-nia aniversáriu ordenasaun Prezbiterál nian.
Informasaun adisionál:
Amu Filomeno sei selebra ninia Misa Moruk ka Misa Agradesimentu nian iha 19 Agostu 2023 iha Igreja Paróquia São João Bosco Laga. Tuirmai, amu Juvito nia Misa Moruk iha Kapela Saelari, Laga mós no taka ho Amu Filipe nia Misa Moruk iha 2 Setembru 2023 iha Paróquia Venilale.
Ekipa KomSos TLS
