Tema Eukaristia ne’e nian bele rezume ho espresaun “povu ne’ebé la’o iha nakukun laran haree naroman boot ida”.
Leitura dahuluk anunsia kosok-oan ida ne’ebé to’o mai, husi David nia dexendénsia, Maromak nia prezente ba Povu, ne’ebé sei halakon kauza sira terus nian, injustisa nian no mate nian, no hahú tempu ida ksolok nian, laran-kontente nian no dame nian ne’ebé sei la nahas.
Evanjellu aprezenta konkretizasaun promesa profétika: Jezús, kosok-oan Belein nian, mak Maromak ne’ebé mai hasoru ema sira atu oferese ba sira – liuliu sira ne’ebé kiak no fraku liu – salvasaun. La’ós salvasaun ida ne’ebé impoin ba ema sira, maibé, salvasaun ida oferese ho laran-luak no domin.
Leitura daruak fó hanoin katak simu Maromak nia salvasaun, ne’ebé sai prezente iha istória ema sira-nian liuhusi Jezús, signifika hakribi valór sira mundu nian, bainhira sira kontráriu ho proposta ne’ebé kosok-oan Belein nian lori mai.
