Baucau – Festa beata Laura Vicuña nian sai motivu ida atu aprezenta nia ba labarik no foin-sa’e sira modelu ida ne’ebé atuál ba ohin loron, iha moris integridade nian, iha virtude pureza.
Ba adultu sira, edukadór/a sira no inan-aman sira, Laura nia moris bele sai inspirasaun ba sira atu fiar iha labarik sira nia korajen no eroisidade atu hili valor aas sira perfeisaun sarani nian. Laura bele tulun inan-aman sira atu eduka oan sira ba moris sarani nia tutun katak SANTIDADE, no santidade la’ós buat seluk maibé domin, haluha an rasik, sakrifísiu, hanesan amlulik selebrante Pe. Agnelio hateten iha omilia.
Nune’e, ohin komunidade edukativa Baucau, halibur hamutuk atu selebra festa Laura Vicuña nian hahú ho jogus sira no hafoin ho Eukaristia no merenda hamutuk. Hanesan dehan ona, selebrante Eukaristia mak Pe. Agnelio SDB, no marka prezensa labarik oratorianu sira, Infánsia Misionária, grupu Laura no Mazzarello, animadór/a sira no joven mane sira husi asrama ESSA, no inan-aman sira.
Tuirmai Laura Vicuña nia istória badak:
Laura Vicuña Moris iha Santiago (Chile) iha 1891.
Bainhira nia aman mate iha 1900, FMA (Figlie di Maria Ausiliatrice) simu nia iha koléjiu iha Junín de los Andes situa iha zona Neuquén, Argentina. Tinan tuir mai nia halo Primeira Komuñaun no, hanesan Domenico Savio, nia formula propózitu sira atu: hadomi Maromak ho an tomak; mortifika an no hili mate duké halo salan; halo ema koñese Jezús no repara ofensa sira hasoru Nia. Bainhira nia komprende katak nia inan moris iha situasaun salan nian, nia oferese nia an ba Na’i ba nia inan nia konversaun.
Ninia biógrafu dahuluk, padre Crestanello hateten: “Laura terus iha nia fuan laran… Loron ida nia deside atu oferese nia moris no simu ho fuan mate, naran katak nia inan hetan salvasaun. Nia husu ha’u atu fó bensan ba ninia hakaran boot ida-ne’e. Ha’u demora kle’ur atu konkorda ho nia”.
Laura intensifika moris sakrifísiu nian no, hodi nia konfesór nia konsentimentu, nia halo votus privadu konsellu evanjéliku sira-nian. Ho sakrifísiu no moras ne’ebé halo nia sai fraku ba beibeik, nia mate iha Junín de los Andes (Argentina) loro 22 Janeiru 1904.
Iha kalan ikus nia moris nian nia fó sai ba nia inan: “Mamá, ha’u atu mate! Kle’ur ona mak ha’u husu ba Jezús buat ne’e, hodi oferese ha’u-nia moris ba ó, atu ó bele fila fali ba Maromak… Mamá, molok mate ha’u bele iha ksolok haree ó arrepende?” Iha loron funerál Laura nian nia inan fila fali ba sakramentu sira no hahú moris foun. Laura nia “isin mate” hela iha kapela Figlie di Maria Ausiliatrice (FMA) iha Bahía Blanca (Argentina).
Iha loron 3 Setembru 1988 iha Colle rahun-di’ak foin-sa’e sira-nian, iha prezensa foin-sa’e sira tokon ba tokon ne’ebé partisipa iha Confronto ’88 nia oin, Amu-Papa João Paulo II beatifika nia no propoin nia nu’udar modelu koerénsia evanjélika lori to’o rohan, ba misaun salvasaun ida.
Loron 22 Janeiru mak loron ba ninia Memória litúrjika.Nia mak padroeira ba labarik sira vítima abuzu nian.
