Fuiloro, 30 Janeiru 2020, iha oras tuku 14:30 OTL, Orador nain rua ne’ebe aprezenta Estreia Reitor Mor nian ba Familia Salesiana mak Padre Rolando Fernandes, SDB ne’ebe koalia kona ba Sarani Diak no Mos Komandante PNTL Lautem Sr. Sebstião Alves Quintão ne’ebe reprezentante Antigu Aluno Escola Agricula Fuiloro, fahe ninia esperensia kona ba Sidadaun Onestu.
Padre Rolando foti topiku “ Sarani diak” sai pontu importante ba familia Salesiana uluk nanain sai EDUKADORA no EVANJELIZADORA ba familia, sosiedade no nasaun Timor Leste.
Valor sira ne’ebe presiza eduka mak:
- Sentidu makaas nu’udar Sidadania
- Justisa Sosial
- Valor evanjeliku sira ne’ebe lori ita atu interioriza no sai programa bai ta nia moris.
Valor evanjeliku ne’e mak: Serbi maluk sira, kompromisu ba moris publiku, honestidade pesoal, alerjia ba korupsaun, sensibilidade ba mundu migrasaun no hadomi meiu ambiente.
Don Bosco nia iha inisiativa atu forma foinsae sira ho Politika Ami Aman, mak atu halo tuir Aman Maromak nia hakarak iha rai nu’udar iha lalehan, liu husi dalan:
- Hakmaan foinsae sira ne’ebe iha kondisaun difisil no iha susar nia laran
- Tulun atu hamenus numeru malandru no badiu sira
- Tulun hamenus numeru kriminal ki’ik no naokten sira
- Tulun hamamuk kadeia sira
Ho liafuan badak “ ATU FORMA SARANI DIAK NO SIDADAUN NE’EBE ONESTU” ne’e mak Estreia Reitor mor nian ba tinan 2020.
Atu sai sarani diak uluk nanain fiar iha Nai, rona Maromak nia liafuan ne’ebe koalia husi Evanjellu hodi haklaken Nai husi ita nia esperensia pesoal ho Maromak rasik, nee mak “ESPIRITUALIDADE SALEZIANA”.
Ikus liu tau Nain Feto Maria nu’udar ita nia inan, tanba liu husi Don Bosco nia mehi tinan sia (9) nian Nain Feto mak sai mestra moris nian ne’ebe fo kbi’it ba Don Bosco iha obra hotu ne’ebe halao ba oin to’o ohin loron.
Orador daruak mak : Komandante PNTL Lautem, Sr. Sebastião Alves Quintão
Esperensia forte nu’udar antigu Aluno Eskola Agricula (ETA Don Bosco Fuiloro)
Komandante ne’e uluk nanain nia espresa an nudar Aluno Eskola agricula iha tinan 1990, sai mos nu’udar animador iha Sentru oratorio Bauro,Iralafai, Somocho to’o Tutuala.
Esperensia forte ho vida orasaun sai sasukat ida ba nia susesu. HUSU, REZA NO HALA’O ne’e mak buat 3 ne’ebe nia aprende e hetan susesu. Iha matenek nain ida ne’ebe dehan: “ ema ne’ebe ho pasensia no haraik an, ema ne’ebe hakarak rona ema seluk nia lian no fo tulun ba ema seluk nia sei hetan futuru ne’ebe nabilan hanesan fitun iha lalehan” kontrariu ho ema ne’ebe foti an no arogante.
Husu ba Antigo/a aluno/a sira, katak buat hotu ne’ebe ita hetan e aprende iha fatin ida ne’e, ita buka atu trasmite e habelar nafatin Karizma ne’ebe simu iha fatin ida ne’e.
Iha parte seluk nia mos fo korajen atu moris iha Responsabilidade, Transparensia no onestidade nu’udar Don Bosco nia oan Sira ne’ebe ema haree diferensia ho ema seluk, tanba Edukasaun ne’ebe hetan fo valor ba ema nia dignidade nu’udar Maromak oan lolos, ne’e mak eransa ne’ebe Aman Don Bosco husik hela ba nia oan sira.
(Ines Bartolo Freitas FMA)
