Loron 02 Fevereiro, nu’udar loron aprezentasaun Nai nian, loron ne’e mos Vigararia Lospalos selebra Eukaristia hamutuk ho Relijiozo/a no mos sarani Parokia Lospalos iha lokraik tuku 17.00 OTL. Misa ne’e preside husi Amo Paroco Lospalos padre Tomas de Carvalho, Sdb. Partisipa iha misa ne’e mak: kongregasaun Salesiano, FMA, Canossa, Vizitasaun no mos sarani sira husi Lospalos.
Selebrasaun ne’e iha sentidu rua Nai Jesus nian mak hanesan:
- Nu’udar sarani tanba sa ita selebra bainhira aprezenta Jesus ba Templu.
- Bensaun Lilin nu’udar Kristu Nia naroman lori mai ita ida-idak
Tuir kreda loron mundial vida konsagrada nian mak loron Aprezentasaun Nai nian. Nu’udar konsagrada Maromak bolu ita atu tuir Nia ain fatin.
Vida konsagrada tuir Konsellu Evanjeliku tolu mak sai iha iha votu tolu iha vida konsagrada nian mak hanesan: Kastidade, Pobreza e Obedensia. Ho votu tolu ne’e tulun ema konsagrada sira atu bele esperensia Maromak Nia domin no iha relasaun intima ho Maromak.
Vida konsagrada foti dalan radikal Batismu nian hodi fo an tomak atu serbi maun alin sira tuir ida-idak nia karisma.
Iha okaziaun ne’e Amo Tomas mos fo hanoin ba familia sira katak, vida konsagrada ne’e mai husi familia ne’ebe laran luak atu fo sira nia oan ba dalan vokasaun nian.
Fo hanoin mos ba foinsae sira atu sai laran luak nafatin hodi hatan ba Maromak nia bolu, maski sei hasoru difikuldades oin-oin maibe buka atu sai metin liutan ho Jesus.
Husi Ir. Adelia Amaral
