MANDATU MISIONARIU 2021 iha ROMA
Roma (Italia) – Enviu misionaria iha tinan ida nee sai oin seluk ho tinan sira ne’ebe liu ona, situasaun troka totalmente ho covid 19 ne’ebe mundu tomak enfrenta. Maibe situasaun ida ne’e la hamate ita nia entuziasmu evanzelizasaun nian maske ho maneira ne’ebe diferente.
Iha dia 01-02-2021 sai loron importante ba familia salesiana tomak tanba salesiano(SDB) hamutuk 24 (22 la marka prezensa) no no Filhas de Maria Auxiliadora (Salesiana ) hamutuk 12, ( rua iha ona fatin destinu no rua seluk seidauk too iha Roma) simu krus misionaria iha kapela Salesiano (casa geral Salesiano) iha Roma.
Selebrasaun hahu ho Santa Missa ne’ebe preside husi Don Angel Fernandez Artime (Retor moor Salesiano) prezente mos Madre Yvonne Rengoat (Madre Jeral FMA), Don Alfred Maravilla (konselleiru jeral ba misaun-SDB), Madre Alaide Deretti (konseleira jeral ba misaun-FMA).
Iha omilia Don Angel hateten katak nudar Salesiano no Salesiana ita nia espiritualidade nia orijem mak espiritu misionaria nian spiritu ida ne’e hahu kedas husi ita nia orijem no kontinua too ohin loron.
Misionariedade mak dimensaun importante iha ita nia karisma salesiana. Es’piritu misionaria ida nee mak halo ita nia kongregasaun buras no habelar lalais too mundu tomak. Sai misionaria presiza tebes atitude haraik-an nia ita ba laos atu hanorin, ita ba laos atu troka mundu tomak maibe ita ba hodi servi.
Madre Jeral, Me. Yvonne iha nia lia menon uluk nanain agradese Maromak ba don vokasaun nian no agradese ba inspetoria sira liu inspetora ida-ida ne’ebe ho laran manas misionaria buka dalan oioin maske ho situasaun difisil ho korajem haruka Irman sira. Ba neo misionaria sira nia husu atu korajem no aten brani hatan ba Maromak iha fatin ne’ebe deit Maromak hakarak imi ba.
Selebrasaun nakonu ho klima familiaridade, klima orasaun no fraternidade. Depois de santa misa neo misionaria sira merenda hamutuk hafoin Reitor Moor hatudu fatin sira iha casa geral salesiano nian. Agradese Maromak buat hotu lao ho diak.
Ikus liu ho fuan nakonu ho gratidaun hau hakarak agradese ba inspetoria liu-liu ba madre Alma no irman sira hotu nia orasaun, sakrifisiu domin no apoiu.
(Albina do Carmo FMA)
