Venilale – Ohin 31 Janeiru Familia Saleziana iha Venilale hamutuk ho eskola sira festeza solenidade S. Joao Bosco nian. Tan, departamentu Edukasaun Munisipiu Baucau hili S.Joao Bosco sai ninia mahein. Nune’e ohin eskola sira iha Munisipiu Baucau nian liliu Postu Administrativu Venilale hahu Anu Letivu foun 2022 nian ho misa iha Festa S. Joao Bosco nian iha parokia Sagrado Coraçao de Jesus Venilale.
Eukaristia santa ne’e selebra husi Padre Provinsiál Pe. Apolinário Ornai Neto SDB ho ko-selebrante Padre na’in haat husi komunidade Beatu Filipi Rinaldi Venilale. Iha omilia amu selebrante hato’o ba familia Saleziana, foin-sa’e sira, labarik no ema hotu ne’ebé prezente katak; ho ksolok ita hahi no agradese Maromak tan kreda foti S. Joao Bosco sai santu universal ba igreja katólika ba sarani hotu atu bele selebra, atu bele hanoin no hetan Maromak nia domin no ninia hakarak moris nian liuhusi S. Joao Bosco. Maibé iha kongregasaun Saleziana S. Joao Bosco nu’udar fundadór ne’ebé kreda proklama nu’udar Aman, Mestre no Belun ba foin-sa’e sira. Ho motivu ida ne’e mak ohin iha mundu tomak familia Saleziana selebra ho maneira espesiál. Iha tinan ida ne’e mós Reitor Mor fó ba familia Saleziana Estreia 2022 ho tema “Halo buat hotu tan Domin la’ós ho obriga” atu selebra tinan 400 S. Francisco de Sales nia mate.
Atitude S. Joao Bosco nu’udar Aman, aprezenta atitude aman inan iha familia doméstika atu akompana oan sira nia formasaun. Atitude Aman iha kreda atu Salezian/ Saleziana, familia Saleziana no edukadór/a sira atu akompana foin-sa’e sira. Nu’udar Mestre mak papél importante edukadór/a sira-nian, atu tulun estudante deskobre ninia identidade nu’udar ema, pesoa no Timor Oan ne’ebé fiar-nain no sidadaun ne’ebé moris iha rai loos nian. Nu’udar Belun, ho lema “ fó klamar mai ha’u buat seluk lori ba”. Don Bosco halo buat hotu to’o iha momentu ida ne’e nia tuir Maromak nia hakarak atu ita hotu nu’udar familia Saleziana sai Maromak nia povu no sai Sarani ne’ebé di’ak no Sidadaun ne’ebé moris iha dalan loos no lialoos. Nune’e ita selebra festa S. Joao Bosco, ita selebra festa ksolok nian, selebra santidade nian no festa Domin nian.
Hafoin depoisde misa, Padre Provinsiál no Inspetór edukasaun Venilale nian Mestre Barnabé hamutuk ho mestre/a fahe merenda ba estudante sira.
Aleinde ne’e iha loron 30 loraik, Padre Provinsiál hasoru mós familia Saleziana Venilale nian hatuk na’in 37 iha komunidade Madre Mazzarello, hodi aprezenta estreia Reitor Mor 2022 nian. Iha ne’e padre Provinsiál ne’ebé sai mós fukun ba unidade ba membuat familia Saleziana tomak iha Timor.Husu atu tetu no pratika liafuan husi S. Francisco de Sales nian Halo buat hotu ho Domin la’ós ho obriga. Hafoin Inspetor husu mos ba membuat Familia Saleziana fó folin ba formasaun kunjuntu liliu bainhira hetan vizita husi Superior/a sira husi Roma no rai laran. Tan sira-nia prezensa no liafuan sira sai momentu formasaun.
(Alice FIlipe FMA)
