Baucau – Ho ksolok boot Familia Salesiana iha Baucau ohin, 31-1-2022 selebra Solenidade São João Bosco nian iha Parokia Santo Antonio Baucau, hodi hasa’e hahi no agradese ba Maromak liu husi Santa Eukaristia Solenidade S. João Bosco, ne’ebe sai aman, mestre no belun ba foinsa’e sira. Ohin mos ofisialmente Edukasaun nivel lokal Munisipiu Baucau foti DB nu’udar mahein ba Edukasaun. Festa ne’e preside husi Mons. Don Marco reprezentante Santa Se nian, ne’ebé haktuir iha nia omilia dehan: DB ho tinan 9 deit sente ona vokasaun especial iha nia fuan hodi simu misaun ida atu tranforma asu fuik sira ne’e, ne’ebé reprezenta foinsa’e sira atu sai fali ema ne’ebé di’ak. No mehi ne’e esplika João Bosco nia misaun katak Maromak fo konfiansa ba nia atu transforma foinsa’e abandonadu sira sai Maromak nia oan. Husi ne’e João Bosco tama seminario sai padre nia harii kongregasaun Salesiana hodi dedika sira nia moris integra iha edukasaun foinsa’e sira nian. Hanesan iha Evanjellu Jesus dehan husik labarik sira mai besik Ha’u, ne’e mak Jesus nia domin ba foinsa’e sira nune’e mos DB nia domin ba foinsa’e sira, hodi tulun sira sai sarani di’ak no sidadaun onestu. Don Marco mos sadik foinsa’e no sarani sira Baucau nian atu hapara violensia nu’udar sarani ne’ebe di’ak. Hafoin kontinua ho almoco Fraternidade iha salaun Dioseze nian no Antigo Aluno sira hamutuk hodi espresa sira nia ksolok ba DB liu husi sira nia knananuk ne’ebe komprimenta Monsiñor no sarani sira, atu lahalakon tradisaun Salesiana nian. Festa ne’e konvida fali Familia Salesiana sira atu tulun foinsa’e sira hapara violensia no kuda JESUS nia domin iha sira liu husi Espiritualidade Salesiana nian ne’ebe DB husik hela.
Sr. Onesiana no Sr. Lourdes
