Libanha Pereira Moniz
Comoro, 28 Janeiru 2023
Ohin, Família Saleziana hala’o marxa ba paz ho Don Bosco, husi Comoro ba to’o Lecidere, ho tema ne’ebé dehan “Fraternidade Umana nu’udar fermentu atu hametin paz iha sosiedade”.
Molok marxa hahú uluk ho orasaun ne’ebé dirije husi Pe. Mário do Rosário, SDB. Hafoin hahú marxa husi Don Bosco Comoro to’o Lecidere.
To’o tiha iha Lecidere rona mensajen husi Mgr. Marco Sprizzi ne’ebé dehan “Fraternidade mak mizerikórdia. Tan ne’e persiza atu harii fraternidade liu husi grasa perdaun no rekonsiliasaun atu harii paz. Timor-Leste sai mós modelu ka ezemplu roman no masin rai nian iha Ázia”.
Señor Lere Anan Timur no Señor Xanana hato’o mós sira nia mensajen. Iha nia mensajen señor Lere dehan: “Uluk atu hetan paz presiza funu. Ohin loron ita ukun an ona presiza atu moris iha dame no hakmatek laran”.
Señor Xanana iha nia lia-menon husu atu harii dame: “Prinsípiu valór kristaun atu ita haree malu di’ak nune’e lolo liman ba ema ne’ebé presiza ita nia tulun. No ba imi joven sira keta hola parte iha “artes marciais” sira no buka atu harii paz iha komunidade, sosiedade no kreda”.
Husi mensajen hirak ne’e fó hanoin óos mai ita estréia Reitór-Mor nian atu sai fermentu iha sosiedade. Ohin ho marxa paz ne’e husu ita atu kontribui hodi harii paz iha ita ida-idak nia sosiedade, ne’e mak ita nia knaar no responsabilidade.
