Roma – Salezianu sira halibur iha Kapítulu Jerál da-27 hili ohin, 25 Marsu, Reitór-Mor foun no Susesór da-10 Don Bosco nian, padre Ángel Fernández Artime, ne’ebé to’o oras ne’e inspetór iha Argentina Sul.
Eleisaun ne’e akontese iha tuku 10:20 dadeer, iha eskrutíniu dahuluk, akompaña ho basa-liman kleur husi asembleia.
Padre Pascual Chávez, Prezidente Asembleia nian, bolu padre Ángel, no hateten nune’e ba nia: “Padre Ángel doben, Maromak liuhusi maun-alin sira bolu ó ohin atu sai susesór Don Bosco nian. Ó simu bolun la’ós atu konforma an eh konfigura an ho Reitór-Mor, la’ós ho padre Vecchi, no la’ós mós ho padre Viganó. Ó mak susesór Don Bosco nian, la’ós padre Chávez nian. Nune’e, iha asembleia nia naran ha’u husu se ó simu”.
Ho emosaun, padre Ángel hatán ho lia-españól: “Ha’u entrega an iha Na’i no ha’u husu Don Bosco no Maria Ausiliadora atu akompaña ita no akompaña ha’u, iha fraternidade saezianu sira-nian no ho Kongregasaun, no ho fiar ha’u aseita”.
Padre Ángel Fernández Artime, tinan 53, moris iha loron 21 Agostu 1960 iha Gozón-Luanco, iha Asturie, España; halo primeira profisaun iha 3 Setembru 1978, votu perpétuu iha 17 Juñu 1984 iha Santiago de Compostela no simu ordenasaun amlulik iha 4 Jullu 1987 iha León.
Orijináriu husi Inspetoria León nian, sai Delegadu Pastorál Juveníl, Diretór eskola Ourense nian, membru Konsellu no vigáriu inspetoriál no, husi 2000 to’o 2006, Inspetór. Nia sai membru komisaun téknika ne’ebé prepara Kapítulu jerál da-26. Iha 2009 hetan nomeasaun Inspetór Argentina Sul, kargu ne’ebé nia mantein to’o ohin; ba ninia papél ne’e nia koñese no kolabora ho kardeál Buenos Aires nian, Jorge Mario Bergoglio, ohin Papa Francisco.
Nia konsege iha diploma iha teolojia Pastorál no lisensiatura iha Filozofia no Pedagojia.
