Iha Loron 29 Janeiro, nakonu ho ksolok no entuziasmu ami simu Me. Assunta iha ami nia Komunidade Maria 
Auxiliadora, Venilale. Ba ami “Madre nia presenza mak ami nia ksolok” Tamba ami mos bele koñese Madre no sente besik ho Istitutu no Madre mos bele hare ami nia realidade hodi fahe ho ami Istitutu nia mehi no esperansa ba foinsa’e no labarik sira iha mundu, liuliu atu salva klamar sira. Komunidade Maria Auxiliadora nia misaun mak tau matan ba Orfanato sira no uma formasaun ba etapa dahuluk katak tau matan ba Pre-aspirante no aspirante sira. Iha Irmán nain 7 (Hitu), aspirante nain 3 (Tolu), Pre-aspirante nain 6 (Ne’en), orfanato hamutuk nain 106 (Atus ida resin Ne’en) no trabalhador Nain 6 (Ne’en). Iha loraik Madre ba hasoru Orfanato sira. Labarik sira komprimenta Madre ho dansa tradisional, hananu ho lian Ingles no Italiano. Iha ne’eba Madre fo hanoin ba orfanato sira kona ba Dom Bosco nia moris, katak Dom Bosco mos uluk ki’ik hanesan imi nia papa mate nia mos orfan tan ne’e Jesus fo nia Mestra ida ne’ebé gia nia iha nia moris tomak. Imi mos iha ne’e tamba Nain Feto gia imi atu to’o iha ne’e. Se karik Nain Feto agora mosu iha ne’e nia sei dehan ba imi hanesan nia dehan ba Joaozinho Bosco: “sai haraik-an, forte no isin diak/forte”. Haraik-an laos deit dehan; lae, lae hau labele halo buat ne’e ka hau la hatene buat ne’eba. Maibe simu ita nia-an ho buat ne’ebé mosu hanesan realidade. Se mak haraik-an hatene deskobre buat ne’ebé furak iha ita nia moris. Nia hare buat ne’ebé pozitivu iha ita nia moris. Forte laos wainhira baku malu ha’u mak manan, maibe iha fuan forte. Ida ne’ebé iha fuan forte hatene hili buat ne’eb’e di’ak. Ha’u tenke halo buat ruma maibe ha’u tenke mos halo buat seluk, entaun ha’u hili saida? Lolos ha’u tenke husu Maromak hakarak saida? Nune’e ita koko atu hili buat ne’ebé di’ak iha Maromak Nia futar oin. Ikus nian sai isin forte. Isin Forte/isin di’ak la tauk atu sala, nia simu nafatin dezafiu sira, nia koko, nia dehan ha’u koko ida ne’e ka koko ida ne’eba atu hare ha’u nia kapasidade. Nia lakon esperansa ba futuru tamba nia isin di’ak bele ba oin ho aten brani. Nain Feto hakarak ita sai bo’ot hanesan Joanzinho.
Iha kalan, Madre fo Boa noite kona ba Beata Maria Troncatti nia kanonizasaun ne’ebé ita hein de’it Santo Padre fo sai data ba eventu importante ne’e. Madre Maria Troncatti mak Santa daruak, Santa dahuluk FMA mak Madre Mazzarello. Madre Troncatti Santa ohin loron nian, iha ita nia tempu. Festa kanonizasaun ne’e fo oportunidade mai ita atu halo renovasaun ba ita nia moris hodi halo di’ak liu tan ba ita nia an no ba foinsa’e sira.
Madre hasoru mos Kandidata sira, ba sira Madre fo hanoin lubuk ida kona ba sira nia prezensa iha ne’e. Tuir Pre-Aspirante Lela Noi Madre fo hanoin katak “mai iha uma Salesiana atu buka Maromak Nia hakarak tamba Maromak mak bolu no hili atu tuir Nia hodi deskobre espiritu salesiana. Nune’e haburas liu tan moris orasaun hodi buka Maromak nafatin, nune’e bele hatene Maromak nia hakarak saida mai ita. Nune’e ba nia Madre nia liafuan sira ne’e bele inspira sira atu hakbesik liutan ba Maromak no hatan ba Maromak nia bolu tuir dalan vokasaun nian tamba sira mak nu’udar esperansa ba Ispetoria. Tuir Aspirante Sofia: “Madre fo hanoin mai ami atu aprende sai edukadora ho estilo Karisma Salesiana (AMOREVOLEZZA), maski mai husi ambiente seluk no hare ona kongregasaun seluk. Husu ami atu aprende aplika Sistema preventivu katak laos ho baku no hakilar maibe ho domin, baibain dehan ‘amorevolezza’. Pasiensia no laran midar la signifika atu hamaus ho maneira furak-furak maibe valoriza sira nia kapasidade tantu nia ki’ik no bo’ot ita hare sira hanesan. Amorevolezza ho domin ne’ebé klean ka mai husi fuan, domin ne’ebé hatene fo valor ba ema nia kapasidade, fo aten brani atu nia haburas maibe uluk nanain fo valor mos ba ita nia kapasidade rasik. Maski difisil, tan ne’e iha etapa aspirante nian mak momentu ne’ebé halo deixernimentu didiak. Nune’e ita reza ba malu tamba imi mak esperansa ba futuru FMA nian. Husi fuan ne’ebé klean ami Komunidade Maria Auxiliadora hamutuk ho Kandidata no Orfanato sira agradese tebes ba Madre nia prezensa iha ami le’et. Tebes, Madre nia prezensa lori duni mai ami ksolok. Hato’o ami nia komprimentus ba Madre jeral no Madre Konsilleira sira. Obrigada.
(Noemia de Deus, FMA)
