Comoro- Dili, 04/01-03/02/2025 
Husi loron 04 Janeiro to’o 03 Fevereiro 2025, irman juniores na’in 6: ir. Benedita dos Santos, ir. Domingas da Silva, ir. Ingracia Afonso Gama, ir. Lourdes de Carvalho, ir. Sidonia Paula no ir. Teresa Correia de Carvalho iha Inspetoria TIN, halo ona sira nia formasaun Segundo novisiado nian, nu’udar preparasaun ba profisaun perpetua, maski nu’udar Inspetoria seidauk halo dixernimentu admisaun nian tamba bazeia ba situasaun ne’ebé iha mudansa liu-liu ho irman estudante sira no nu’udar Instituto formasaun mak dalan uniku atu forma irman sira atu fiel ba Maromak liu husi karisma Salesiana nune’e irman sira halao sira nia formasaun tomak ho ksolok no entusiasmo tamba formasaun sira mak prezente gratuita husi Kreda no Kongregasaun. Akompañadora principal mak Inspetora ir. Evangelina da Costa Xavier-provinsial TIN, maibe iha mos irman sira seluk ne’ebé ho laran luak no domin kolabora maka’as iha Inspetoria hodi sai formadora ba irman juniora na’in 6 nia formasaun. Tema sira ne’ebé haklean iha formasaun ida ne’e mak Dixernimento, Tau matan ba an rasik no tau matan ba ema seluk, Fidelidade, Sistema Preventivu, Aliansa, komunikasaun social, Dimensaun Mariana, Dimensaun Missionaria no Ita nia formasaun. Kada formadora aprezenta sira nia topiku sira ho ida-idak nia kreatividade ho objetivu atu irman partisipante sira bele rona, simu no assimila tema sira ne’ebé haklean tamba formasaun mak xave ida atu loke ema ida-idak tama klean iha sira nia moris rasik nu’udar umana no konsagrada ida. Dokumentu sira ne’ebé sai nu’udar fonte ba enkontru sira mak Biblia, Kontituisaun FMA, karta Madre Mazzarello nian, Kuda abut iha aliansa no mos dokumentu sira seluk Kreda nian no Instituto nian. Metodu ne’ebé uza mak aprezentasaun husi formadora sira, reflesaun pessoal, charing group, Adorasaun Santissimo no selebrasaun orasaun no impeñu sira molok remata topiku ida.
Iha ambiente hakmatek no klima silensiu no orasaun nian, sai momentu furak ba ida-idak atu rona Maromak koalia mai ami, tamba tuir Constituisaun FMA nian dehan “formador los mak Espirito Santo” ne’ebé iha kbiit atu muda no transforma ema nia fuan sira ne’ebé loke-an ba Dons sira Espirito santo nian. Husi tema sira ne’ebé haklean mak prezente grasa nian mai ami ida-idak tamba tulun ami atu fiel ba Maromak nia domin no fiel ba karisma, hodi tau Maromak nia Liafuan mak fonte no matadalan uniku ne’ebé gia ita atu halo buat hotu tuir nafatin Maromak nia hakarak; exije husi ema atu fo tempu rona no medita Na’i nia Liafuan ho badinas no laran manas iha moris lor-loron nian, tau matan ba ita nia relasaun pessoal ho Maromak liu husi moris orasaun nian, simu ho fiar Kristu nia Futar Isin no Ran ne’ebé prezente nafatin iha Eukaristia loron-loron nian no pratika ho devosaun no fiar piedade sira ka moris orasaun Instituto FMA nian. Fidelidade ba karisma ninia abut mak Don Bosco no Madre Madre sira nia moris rasik ne’ebé oras ne’e sai ita nia Evanjellu daruak (Konstituisaun) ne’ebé sai ita nia matadalan seguru ba santidade liu husi ita nia saran-an tomak atu salva klamar sira ba Maromak; 
Fomasaun ida ne’e sai uniku liu iha ami nia moris nu’udar FMA tamba hodi rona, haklean no charing sira; halo ami deskobre oinsa Maromak hadomi ami liu husi Kongregasaun; ne’ebé dala barak ita infiel maibe Maromak fiel nafatin ba ita, momentu avaliasaun nian atu hafoun nafatin ami nia sin ba Maromak iha momentu hotu moris nian; no momentu grasa nian ne’ebé halo ami aten brani atu hafoun impeñu sira hodi tuir Jesus nia hakarak sira: tau konfiansa tomak iha Jesus no Maria ne’ebé bolu ita, hakas-an reza ba malu no reza nafatin ho fervor, hadomi moris komunidade entre irman sira no misaun ho labarik no foinsa’e sira ne’ebé provodensia Divina entrega ba ita.
Sr.Domingas da Silva FMA
