Ho fuan nakonu ho domin ami agradese ba madre Assunta nu’udar konsilleira jeral hodi halo vizita kanónika iha ami nia komunidade St. Maria Mazzarello-Venilale. Ami, comunidade edukante ne’ebe composto husi FMA, profesores, representante inan-aman no oratoriano sira, kolaboradores sira iha comunidade no iha clinica, estudante tecnico vocasional, animadores oratorio, ADMA no antiga aluna sira, halibur iha ne’e selebra festa gratiduan mundial ba madre Jeral madre Chiara Cazzuola hamutuk ho ami, madre Maria Assunta, Ispetora Timor no Indonesia irmãn Evangelina hamutuk ho nia konsileira sira no diretora ida-idak husi komunidade Ispetoria TIN nian. Ami hotu hamutuk iha ne’e hakarak selebra no espresa ami nia ksolok gratidaun ba madre Chiara Cazzuola liu husi drama kona-ba santa Maria Troncatti nia moris to’o nia mate. Nune’e komunidade haksolok tebes hodi selebra festa agradesementu ba madre Assunta,FMA, no selebra hamutuk ho festa gratidaun madre Jeral nian madre Chiara Cazuola, FMA ho tema: SAI MISIONARIA IHA FATIN HOTU-HOTU. Agradesementu ne’e hahu ho selebrasaun Eukaristia ne’ebe prezide husi Rev. Dom Leandro Maria Alves, bispo Dioseze de Baucau, haktuir iha omília: Jesus hatudu lolos lala’ok Bom Pastor nian, hahalok bibi atan di’ak nian mak Nia sei fo Nia-an ba nia bibi sira, nia koñese sira no sira koñese nia, nune’e ita bele koko no deskobre Na’i nia domin. Nudar bibi atan di’ak, madre superiora sira mos sai bibi atan atu bali no kuidadu bibi sira atu bibi sira sente haksolok no sai odamatan ba misaun hodi kolabora no tulun irmán sira iha hamrook ba misaun hodi sai misionaria. Santa Maria Troncatti nu’udar ezemplo lolos hodi rona bibi sira nia lian la ho tauk atu ba misionaria iha ailaran, hodi serbí ki’ik no ki’ak sira. Nune’e mos madre Jeral, me. Chiara nia dezejo ba FMA sira atu sai misionaria iha fatin hotu-hotu, hodi latauk atu loke ita nia fuan ba misionaria iha Maromak nia fatin sira ne’ebé presiza teb-tebes tulun.
Hafoin kontinua ho atividade konfraternizasaun no aprezentasaun drama, puizia no dansa husi grupu oi-oin ne’ebé hola parte iha komunidade nia misaun. Drama no puizia sira ko’alia kona-ba madre Troncatti nia moris hodi tulun labarik oratorianu, foinsa’e, estudante no familia sira atu koñese liu tan madre Troncatti nia moris liu-liu nia karidade no domin ba povu shuar no kolonial sira atu bele hetan paz entre tribú rua ne’e. Ho ninia sakrifisiu hotu tribú rua ne’e hetan duni rekonsiliasaun no paz no ikus sira hanaran madre Troncatti nu’udar madresita no artezana paz nian. Nune’e ho madre Trocatti nia moris bele hafanu ami nia entuziasmu no moris atu serbí ema seluk. Ami hotu ne’ebe hamahan-an iha komunidade Santa Maria Mazzarello Venilale-Timor Leste haksolok tebes selebra festa gratidaun. Ami hahi no agradese Maromak ba ita madre Chiara nu’udar tali komuñaun no uniaun iha Institutu ne’ebe lori FMA ida-idak iha ita nia fuan iha ne’ebe deit ita ba. Ita rasik dehan: “Festa Mundial gratidaun nian mak eventu ida ne’ebe hametin ita-nia identidade familiar no ita fila fali ba orijen sira ita-nia karizma nian. Iha Espiritualidade Salesiana, festa gratidaun nian iha valor edukasional ne’ebe boot. Hanorin no eduka ita-nia an atu dehan “ Obrigado/a” mak hahalok dahuluk atu rekoñese Maromak nia domin no buat ne’ebe iha ita-nia maun alin sira, iha ne’ebe ita fahe ita-nia moris”. Liafuan murak ne’e ami rai iha ami nia fuan no sei fó liras husi espirito santo.
Festa ne’e taka ho lia menon husi madre Assunta haktuir: Dom Bosco harii nia kongregasaun nu’udar monumentu moris nian ba Maria, tan ne’e lor-loron ita hananu Magnifikat katak knananuk agradesementu nian. Tanba Maromak hateke mai ita no bolu ita atu hananu hamutuk Magnifikat iha moris lor-loron.
Tempu hanesan ami agradese rev. Dom Leandro Maria Alves, ne’ebe marka prezensa hahu husi selebrasaun Eukaristia to’o remata. Dom Leandro haksolok tebes hodi partisipa iha festa madre Jeral nian hamutuk ho madre konsilleira madre Assunta, madre ispetora ho konsilleira sira, irmán diretora, irmán sira, labarik oratorianu, foinsa’e no familia salesiana sira. Ohin mos Selebra madre Troncatti nia moris nu’udar misionaria, hanesan Jesus dehan imi ba fatin hotu- hotu. Nune’e mai kontinua hahi Maromak hodi hananu Magnifikat iha ita nia moris lor-loron nian nu’udar dalan santidade nian. Grazie mille madre Chiara.
Sr. Nina,FMA
