Liturjia Solenidade Santu sira nian, iha Ritu Romanu, aprezenta Evanjellu Rahun diak sira-nian (Mt 5,1-12a). Ho liafuan “Ksolok ba sira ne’ebé kiak, sira ne’ebé tanis, no sira ne’ebé halerik…”, Jezús fó sai Evanjellu, lia-foun di’ak kona-ba transformasaun ne’ebé ninia Reinu lori ba mundu.
Liafuan dahuluk husi ninia haklaken mak, “ Konverte imi an ba, basá Reinu Lalehan nian besik ona” (Mt 4,17). Konversaun signifika muda ema nia modu hanoin nian, literalmente «muda ema nia hanoin»: kondisaun esensiál atu rona no tau iha prátika Liafuan sira. Hirak ne’ebé esperimenta difikuldade hanaran “beatu” la’ós tanba terus ne’ebé sira esperimenta, maibé tanba partikularmente sira nakloke atu simu Maromak nia grasa, prezente ida ne’ebé transforma moris.
Santu la’ós ema ne’ebé konsege halo buat hotu ho fasil. Dala barak nia hasoru obstákulu, dezentendimentu, opozisaun, no mós koʼalia aat husi ema seluk. Ninia grandeza maka iha ninia kapasidade atu transforma provasaun sira-ne’e ba oportunidade sira atu fó sasin ba fiar, esperansa no karidade, to’o pontu atu halo di’ak, buras iha fatin ne’ebé ita hanoin imposivel.
Santidade saleziana karakteriza, la seluk la leet, mak iha desiderio ida konfiansa nian iha Maromak nia domin, ne’ebé tradús iha “ksolok” ne’ebé Madre Mazzarello deskreve iha ninia karta sira nu’udar “sinál fuan nian ne’ebé hadomi tebes Na’i” (L 60,5).
Iha tempu ida ne’ebé marka ho avansu teknolójiku estraordináriu, hanesan sira ne’ebé relasiona ho Intelijénsia Artifisiál ho konflitu sira ne’ebé habelar no sai normalizadu to’o pontu ida ne’ebé halo rearmamentu sai hanesan perspetiva ida ne’ebé konsidera inevitavel hosi ema barak, lójika hosi rahun diak sira mosu ezijente no aktusl. Dezafiu epokál sira ne’ebé karakteriza ita-nia mundu aprezenta mai ita ho hilin ida ne’ebé desizivu: aprende maneira foun atu moris hamutuk ka hasoru krize ambientál, sosiál no umanitária ne’ebé grave ba beibeik.
Rahun diak sira mak, sai loloos, “lalatak ida hosi Jezús no Maria nia oin no konstitui ita-nia vokasaun kle’an ba santidade; sira espresa ezijénsia konkreta atu sai Jezús nia dixípulu sira, realidade ida ne’ebé bazeia iha dignidade batizmál. Rahun diak sira maka xave atu komprende fiar-na’in nia moris” (Madre Chiara CAZZUOLA, Cir. No. 1056 Preparasaun ba Kapítulu Jerál XXV, Institutu Filhas de Maria Auxiliadora, Roma, 2026).
Tanba razaun ida-ne’e, santidade ohin loron manifesta an iha kbiit atu transforma moris loroloron nian. Fiar-nain sira nia hanoin, liafuan, prezensa no asaun sira sai, iha tempu hanesan, denúnsia ida ba buat aat iha ninia forma hotu no proklamasaun kriativa ida umanidade foun nian. Sira ne’ebé moris Evanjellu haree ba realidade ho krítiku, lahó aseita pasivamente interpretasaun preparadu ona no husik Evanjellu fó naroman ba sira-nia dixernimentu. Nia mós sente bolu atu kolabora, atu nune’e kriasaun no istória sai duni uma ba ema hotu, hodi kuda atitude sira laran-luak nian, akolhiensa, respeitu no apresiasaun ba dimensaun umana auténtiku, hamutuk ho benevolensia sinseru ba ema ida-idak.
Figura santu sira Institutu Filhas de Maria Ausiliadora nian fó sasin kona-ba oinsá Rahun diak sira bele moris ho modu orijinál no frutuozu iha tempu no kultura hotu. Santa Maria Domingas Mazzarello, Santa Maria Troncatti, Beata Laura Vicuña, Beata Maddalena Morano, Beata Eusebia Palomino, Beata Maria Romero, Beata Maria Carmen Moreno Benítez, Beata Maria Amparo Carbonell Muñoz, Veneravel Laura Meozzi, Veneravel Teresa Pantellini, no Maromak nia atan Madre Rosetta Marchese no Madre Antonietta Böhm kontinua sai ba Institutu no ninia komunidade edukativa sira kompañeiru iha viajen no mós ezemplu aten brani nian, rekursu nian, no kriatividade nian.
Sira-nia maneira atu moris Rahun diak Evanjellu nian mak úniku, ho abut klean iha realidade istórika ne ebé sira moris ba, hodi oferese resposta orijinál no efikás ba dezafiu oioin sira-nia tempu nian.
Iha solenidade ida-ne’e, sira-nia mensajen bele deskobre filafali iha roman Rahun diak evanjelika nian:
- Santa Maria Domingas Mazzarello moris ona pobreza iha espíritu, halo nia an disponivel atu simu misaun foun ida;
- Santa Maria Troncatti maka operadora dame nian;
- Beata Laura Vicuña, ho nia pureza no domin filiál, tulun lori nia inan fila fali ba Maromak;
- Beata Maddalena Morano iha hamlaha no hamrook ba justisa ba labarik-feto no foin-sa’e sira Sisília nian, hanesan mós Beata Maria Romero, ne’ebé hahú obra sosiál boboot ba ema ema kiak sira Costa Rica;
- Beata Eusebia Palomino hala’o ona moris mizerikórdia nian, la rende maibe ho esforsu atu haklaken Evanjellu, to’o oferese ninia an tomak;
- Beata Maria Carmen Moreno Benítez no Maria Amparo Carbonell Muñoz, hamutuk ho Veneravel Laura Meozzi, fó sasin kona-ba rahun diak ba persegidores sira;
- Venerável Teresa Valsè Pantellini maka ezemplu ida laran-maus nian hodi eduka labarik-feto sira ne’ebé kiak liu;
- Maromak nia atan sira Madre Rosetta Marchese no Madre Antonietta Böhm mantein fiar klean iha Eukaristia no iha Maria Auxiliadora, sai sinál konkretu prezensa Jezús no Maria nian ba ema hotu ne’ebé sira hasoru.
Hodi laran metin ba sira-nia intersesaun iha tempu difikuldade no provasaun signifika haburas ita-nia fiar no la’o ho matan ne’ebé hateke ba lalehan, hodi husik ita-nia an hetan orientasaun husi ezemplu nabilan moris evanjélika nian.
Sira ne’ebé simu grasa liuhusi sira-nia intersesaun konvida atu hato’o ba enderesu email animazionesantitafma@cgfma.org ka liuhosi korreiu regulár ba Sekretariadu Jerál Institutu FMA nian.
Fonte: cgfmanet.Org
